సంచలనం సృష్టించిన పొక్సో (POCSO) కేసులో నిందితుడిగా ఉన్న బండి భగీరథ్ను పోలీస్ కస్టడీకి అనుమతిస్తూ మేడ్చల్ మల్కాజ్గిరి కోర్టు కీలక ఉత్తర్వులు జారీ చేసింది. ఈ కేసులో మరింత లోతుగా విచారణ జరపడంతో పాటు మరిన్ని ఆధారాలు సేకరించడానికి నిందితుడిని తమకు అప్పగించాలన్న పోలీసుల పిటిషన్ను న్యాయస్థానం సమర్థించింది. భగీరథ్ను మూడు రోజుల పాటు పోలీస్ కస్టడీకి అనుమతిస్తూ ఆదేశాలు ఇచ్చింది.
కోర్టు ఉత్తర్వుల ప్రకారం, బుధవారం నుండి పోలీసులు భగీరథ్ను తమ ఆధీనంలోకి తీసుకుని విచారించనున్నారు. ఇప్పటికే బాధితురాలి నుండి సేకరించిన స్టేట్మెంట్ ఆధారంగా ఈ మూడు రోజుల వ్యవధిలో ఘటన జరిగిన తీరు, ఇతరుల ప్రమేయం మరియు సాంకేతిక ఆధారాలపై దర్యాప్తు సంస్థ ప్రత్యేకంగా దృష్టి సారించనుంది. అయితే, విచారణ సమయంలో నిందితుడిపై ఎటువంటి ఒత్తిడి గానీ, థర్డ్ డిగ్రీ గానీ ఉపయోగించకూడదని కోర్టు స్పష్టమైన నిబంధనలు విధించింది. అలాగే ప్రతిరోజూ విచారణ ముగిసిన తర్వాత నిందితుడికి వైద్య పరీక్షలు నిర్వహించి, ఆ నివేదికను సమర్పించాలని పోలీసులను ఆదేశించింది.
రాజకీయంగా కూడా సున్నితమైన కేసు కావడంతో పోలీసులు అత్యంత అప్రమత్తంగా వ్యవహరిస్తున్నారు. కస్టడీ సమయంలో భగీరథ్కు సంబంధించిన మొబైల్ డేటా, కాల్ రికార్డ్స్, సోషల్ మీడియా కార్యకలాపాలను కూడా నిశితంగా పరిశీలించనున్నారు. ప్రస్తుతం చర్లపల్లి జైలులో రిమాండ్లో ఉన్న భగీరథ్ను కస్టడీ గడువు ముగిసిన తర్వాత తిరిగి కోర్టులో ప్రవేశపెట్టనున్నారు. పొక్సో చట్టం కింద నమోదైన కేసు కావడంతో పోలీసులు అత్యంత పకడ్బందీగా ఛార్జ్ షీట్ సిద్ధం చేసే పనిలో నిమగ్నమయ్యారు.
