తెలంగాణలో వ్యవసాయ మోటార్లకు మీటర్లు పెట్టేందుకే కాంగ్రెస్ ప్రభుత్వం ‘రైతు డిస్కం’ ఏర్పాటు చేస్తోందంటూ ప్రతిపక్ష బీఆర్ఎస్ చేస్తున్న ఆరోపణలపై ముఖ్యమంత్రి రేవంత్ రెడ్డి తీవ్రంగా స్పందించారు. ఈ ప్రచారాన్ని పచ్చి అబద్ధాలుగా కొట్టిపారేసిన ఆయన.. బీఆర్ఎస్కు ఒక సంచలన సవాల్ విసిరారు. తమ ప్రభుత్వం మోటార్లకు మీటర్లు బిగించినా, లేదా రైతులకు ఇచ్చే ఉచిత విద్యుత్ పథకాన్ని రద్దు చేసినా రాబోయే ఎన్నికల్లో కాంగ్రెస్ పార్టీ అసలు పోటీనే చేయబోదని స్పష్టం చేశారు. ఒకవేళ తాము మీటర్లు పెట్టకుండా ఉచిత విద్యుత్ను విజయవంతంగా కొనసాగిస్తే, బీఆర్ఎస్ పార్టీ ఎన్నికల బరి నుంచి తప్పుకుంటుందా అని సీఎం నిలదీశారు.
రైతులకు 24 గంటల పాటు నాణ్యమైన, అంతరాయం లేని ఉచిత విద్యుత్ అందించడంతో పాటు జవాబుదారీతనం పెంచడమే ‘రైతు డిస్కం’ యొక్క అసలు ఉద్దేశమని రేవంత్ రెడ్డి వివరించారు. దేశంలోనే ఇలాంటి ఒక వినూత్నమైన ఏర్పాటు చేయడం ఇదే తొలిసారని ఆయన పేర్కొన్నారు. ఈ సందర్భంగా బీఆర్ఎస్ నేత హరీశ్ రావుపై సీఎం ఘాటు వ్యాఖ్యలు చేశారు. వచ్చే ఎన్నికల నాటికి హరీశ్ రావు ఏ పార్టీలో ఉంటారో ఆయనకే తెలియదని ఎద్దేవా చేస్తూ, వచ్చే ఎన్నికల్లో బీజేపీ-బీఆర్ఎస్ కలిసి పోటీ చేయడం ఖాయమని జోస్యం చెప్పారు. అలాగే, తాను 2034 వరకు తెలంగాణ రాజకీయాల్లోనే ఉంటానని, 2029లో కూడా కాంగ్రెస్ పార్టీయే మళ్లీ అధికారంలోకి వస్తుందని ధీమా వ్యక్తం చేశారు.
ఇక ధాన్యపు కొనుగోళ్ల అంశంపై కూడా సీఎం రేవంత్ రెడ్డి కేంద్రానికి, స్థానిక బీజేపీ నేతలకు గట్టి హెచ్చరికలు జారీ చేశారు. మద్దతు ధర ప్రకటించిన కేంద్ర ప్రభుత్వమే వడ్లను కొనుగోలు చేయాలని, లేనిపక్షంలో జూన్ 15 తర్వాత రాష్ట్రంలోని బీజేపీ నేతల ఇళ్ల ముందు వడ్ల కుప్పలు పోసి నిరసనలు తెలుపుతామని స్పష్టం చేశారు. గత ప్రభుత్వ హయాంలో జరిగిన విద్యుత్, కాళేశ్వరం ప్రాజెక్టు అక్రమాలపై ఇప్పటికే సీబీఐకి ఫిర్యాదు చేశామని గుర్తుచేసిన ఆయన.. దీనిపై కేంద్ర మంత్రి కిషన్ రెడ్డి వెంటనే స్పందించాలని డిమాండ్ చేశారు.
