ఆంధ్రప్రదేశ్ ప్రజలకు విపత్తుల నిర్వహణ సంస్థ అత్యంత కీలకమైన హెచ్చరిక జారీ చేసింది. రాష్ట్రంలోని పలు జిల్లాలలో పిడుగులతో కూడిన మోస్తరు నుండి భారీ వర్షాలు కురిసే అవకాశం ఉన్న నేపథ్యంలో ‘రెడ్ అలర్ట్’ (Red Alert) ప్రకటిస్తున్నట్లు సంస్థ ఎండీ ప్రఖర్ జైన్ వెల్లడించారు. విదర్భ నుండి తమిళనాడు వరకు విస్తరించి ఉన్న బలమైన ద్రోణి ప్రభావం వల్ల ఈ అకాల వాతావరణ మార్పులు సంభవిస్తున్నాయని, వర్షం పడే సమయంలో గంటకు 50 నుండి 60 కిలోమీటర్ల వేగంతో బలమైన ఈదురుగాలులు వీచే ప్రమాదం ఉందని అధికారులు అంచనా వేశారు.
ఈ తీవ్ర హెచ్చరికల నేపథ్యంలో అల్లూరి సీతారామరాజు, తూర్పుగోదావరి, ఏలూరు, ఎన్టీఆర్, కృష్ణా, గుంటూరు మరియు పల్నాడు జిల్లాల ప్రజలు అత్యంత అప్రమత్తంగా ఉండాలని విపత్తుల నిర్వహణ సంస్థ సూచించింది. భారీ వర్షాలు, ఈదురుగాలులు వీచే సమయంలో ఎవరూ కూడా చెట్ల కింద, బలహీనమైన హోర్డింగ్స్ లేదా విద్యుత్ స్తంభాల వద్ద నిలబడకుండా సురక్షితమైన భవనాలలో ఆశ్రయం పొందాలని అధికారులు స్పష్టం చేశారు. వీటితో పాటు విజయనగరం, విశాఖపట్నం, పార్వతీపురం మన్యం, కాకినాడ, పశ్చిమ గోదావరి జిల్లాలకు వాతావరణ శాఖ ‘ఆరెంజ్ అలర్ట్’ జారీ చేసింది.
మరోవైపు, రాష్ట్రంలో విచిత్రమైన వాతావరణ పరిస్థితులు నెలకొననున్నాయి. బుధవారం ఒకవైపు గుంటూరు, బాపట్ల, పల్నాడు, కర్నూలు, అనంతపురం, నెల్లూరు, కడప సహా పలు జిల్లాల్లో తేలికపాటి నుండి మోస్తరు వానలు పడే అవకాశం ఉండగా.. అదే సమయంలో శ్రీకాకుళం, విజయనగరం, కాకినాడ, కృష్ణా జిల్లాల్లో ఎండ తీవ్రత కూడా గరిష్ఠ స్థాయిలో ఉండనుంది. ఈ ప్రాంతాలలో బుధవారం పగటి ఉష్ణోగ్రతలు 42 నుండి 44 డిగ్రీల వరకు నమోదయ్యే ఆస్కారం ఉందని, అందువల్ల ప్రజలు వాతావరణ పరిస్థితులకు అనుగుణంగా తగిన జాగ్రత్తలు తీసుకోవాలని విపత్తుల నిర్వహణ సంస్థ కోరింది.
