ఇమామ్లు, మౌజన్ల కుటుంబాలకు 99 గజాల చొప్పున స్థలాలు కేటాయిస్తున్నట్లు సోషల్ మీడియాలో జరుగుతున్న తప్పుడు ప్రచారాన్ని తెలంగాణ రాష్ట్ర వక్ఫ్ బోర్డు తీవ్రంగా ఖండించింది. ఇదొక మోసపూరిత ప్రకటన అని, ప్రజలు ఇలాంటి వార్తలను నమ్మవద్దని బుధవారం స్పష్టం చేసింది.
కిషన్బాగ్కు చెందిన ‘సూఫీ ఉలేమా కౌన్సిల్’ అనే సంస్థ పేరుతో ఉర్దూలో ముద్రించిన ఒక కరపత్రం సోషల్ మీడియాలో వైరల్ అవుతోంది. ఇమామ్లు, మౌజన్ల భార్యలు, సోదరీమణులు లేదా తల్లులకు 99 గజాల స్థలం కేటాయిస్తామని, ఇందుకు రేషన్ కార్డ్, ఆధార్ కార్డ్ వంటి ధ్రవీకరణ పత్రాలతో కిషన్బాగ్లోని ఒక చిరునామాలో దరఖాస్తు చేసుకోవాలని అందులో పేర్కొన్నారు. ఇందుకు జూలై 15ను తుది గడువుగా ప్రకటించారు.
ఈ నకిలీ నోటీసుతో వక్ఫ్ బోర్డుకు గానీ, తెలంగాణ ప్రభుత్వానికి గానీ ఎలాంటి సంబంధం లేదని అధికారులు స్పష్టం చేశారు. సదరు కరపత్రంలో పేర్కొన్న ‘సూఫీ ఉలేమా కౌన్సిల్’ అనే సంస్థతో తమకు ఎటువంటి అనుబంధం లేదని బోర్డు పౌర సంబంధాల అధికారి వెల్లడించారు.
అమాయక ప్రజల నుంచి వ్యక్తిగత వివరాలు సేకరించి మోసం చేసేందుకే ఈ నకిలీ నోటీసును సృష్టించి ఉంటారని అధికారులు అనుమానం వ్యక్తం చేస్తున్నారు. ఈ నేపథ్యంలో ఇమామ్లు, మౌజన్లు, వక్ఫ్ సంస్థల ప్రతినిధులు మరియు సాధారణ ప్రజలు ఈ ప్రకటనను నమ్మి తమ పత్రాలను ఎక్కడా సమర్పించవద్దని బోర్డు విజ్ఞప్తి చేసింది. ఈ నకిలీ ప్రచారానికి బాధ్యులైన వారిపై చట్టపరమైన చర్యలు తీసుకునే అంశాన్ని పరిశీలిస్తున్నట్లు వక్ఫ్ బోర్డు తెలిపింది.
