ఉత్తరప్రదేశ్ (UP) మీరట్ జిల్లాలో సినిమా స్టోరీని తలపించే అత్యంత భయంకరమైన హత్య ఉదంతం వెలుగుచూసింది. వివాహేతర సంబంధానికి అడ్డొస్తున్నాడనే కారణంతో పాటు, ఇన్సూరెన్స్ డబ్బుల కోసం కక్కుర్తి పడి ఒక మహిళ తన ప్రియుడితో కలిసి భర్తను పాము కాటుతో చంపిన వికృత రూపం మీరట్ జిల్లా హస్తినాపురంలో చోటుచేసుకుంది. పోలీసులు తెలిపిన వివరాల ప్రకారం.. భందోరా గ్రామానికి చెందిన అతుల్ పన్వార్ (35), దామిని అనే దంపతులు హస్తినాపూర్లో ఒక ప్రైవేట్ పాఠశాలను నడుపుతున్నారు. ఈ క్రమంలోనే సదరు స్కూల్ బస్ డ్రైవర్గా పనిచేస్తున్న తుషార్ అనే యువకుడితో దామినికి వివాహేతర సంబంధం (ఎఫైర్) ఏర్పడింది. వీరిద్దరి రహస్య వ్యవహారం కాస్తా అతుల్కు తెలియడంతో, అతడిని ఎలాగైనా శాశ్వతంగా వదిలించుకోవాలని ఆ కిరాతక జంట నిర్ణయించుకుంది.
కేవలం భర్తను చంపడమే కాకుండా, అతని పేరు మీద ఉన్న భారీ ఆర్థిక ప్రయోజనాన్ని కూడా దక్కించుకోవాలని ఆ ఇద్దరూ స్కెచ్ వేశారు. అతుల్ పేరిట ఉన్న రూ.20 లక్షల ఇన్సూరెన్స్ (భీమా) డబ్బులను క్లెయిమ్ చేసి కాజేయాలని పథకం రచించారు. సాధారణంగా ఆయుధాలతోనో లేదా విషమిచ్చో చంపితే పోస్టుమార్టంలో పోలీసులకు దొరికిపోతామనే భయంతో, దీనిని సహజమైన ప్రమాద మరణంగా చిత్రీకరించేందుకు ప్లాన్ చేశారు. ఈ క్రమంలోనే గురువారం రాత్రి దామిని తన ప్రియుడు తుషార్తో కలిసి బెడ్రూమ్లోకి ఒక తీవ్ర విషపూరితమైన పామును తెచ్చింది. అనంతరం గాఢ నిద్రలో ఉన్న భర్త అతుల్ను ఆ పాముతో కరిపించి అత్యంత అమానుషంగా హతమార్చారు.
అతుల్ అకస్మాత్తుగా మరణించడంతో మొదట కుటుంబ సభ్యులు, బంధువులు దానిని సాధారణ పాము కాటు వల్ల జరిగిన ప్రమాదంగానే భావించారు. అయితే, ఈ మరణంపై అనుమానం రావడంతో పోలీసులు కేసు నమోదు చేసి అన్ని కోణాల్లో నిశితంగా దర్యాప్తు చేపట్టారు. అనుమానితులైన దామిని, తుషార్ ల మొబైల్ కాల్ డేటాను నిశితంగా పరిశీలించి, వారి ప్రవర్తనపై గట్టి నిఘా ఉంచిన పోలీసులకు అసలు నిజం తేటతెల్లమైంది. ఇన్సూరెన్స్ డబ్బులు, తమ వివాహేతర సంబంధాన్ని కొనసాగించడం కోసమే ఈ ఘాతుకానికి ఒడిగట్టినట్లు నిందితులు పోలీసుల విచారణలో తప్పు ఒప్పుకున్నారు. దీంతో పోలీసులు నిందితులు ఇద్దరినీ అదుపులోకి తీసుకుని జైలుకు తరలించి, చట్టప్రకారం కఠిన చర్యలకు సిద్ధమయ్యారు.
