త్రిపుర పోలీస్ ప్రధాన కార్యాలయంలో సోమవారం (జూలై 20) ఒక దిగ్భ్రాంతికరమైన ఘటన చోటుచేసుకుంది. రాష్ట్ర పోలీస్ డైరెక్టర్ జనరల్ (డిజిపి), 1994 బ్యాచ్కు చెందిన సీనియర్ ఐపీఎస్ అధికారి అనురాగ్ ధన్ఖడ్ అగర్తలలోని తన కార్యాలయంలోనే సర్వీసు రివాల్వర్తో కాల్చుకుని బలవన్మరణానికి పాల్పడ్డారు. తీవ్ర రక్తస్రావంతో అపస్మారక స్థితిలోకి వెళ్లిన ఆయనను సిబ్బంది వెంటనే గోవింద్ వల్లభ పంత్ ఆసుపత్రికి తరలించారు. అయితే, ఆయనను కాపాడటానికి వైద్యులు సుమారు 40 నిమిషాల పాటు సీపీఆర్ (CPR) చేసినప్పటికీ ఫలితం లేకపోయింది. మధ్యాహ్నం 12:48 గంటలకు ఆయన మరణించినట్లు ఆసుపత్రి వైద్యుడు ప్రదీప్ భౌమిక్ అధికారికంగా ప్రకటించారు.
మూడు దశాబ్దాలకు పైగా సుదీర్ఘమైన, అత్యంత ప్రతిష్టాత్మకమైన కెరీర్ కలిగిన అనురాగ్ ధన్ఖడ్.. అమితాబ్ రంజన్ పదవీ విరమణ చేసిన అనంతరం మే 2025లో త్రిపుర డీజీపీగా బాధ్యతలు స్వీకరించారు. అంతకుముందు ఆయన రాష్ట్ర ఇంటెలిజెన్స్ విభాగం డైరెక్టర్ జనరల్గా విధులు నిర్వర్తించారు. 1995లో ఎస్పీగా కెరీర్ ప్రారంభించిన ఆయన, 2003–04 మధ్య కొసోవోలో ఐక్యరాజ్యసమితి (UN) అంతర్జాతీయ పోలీసింగ్ మిషన్లో కూడా పాలుపంచుకున్నారు. కేంద్ర సర్వీసుల్లో డెప్యుటేషన్పై బ్యూరో ఆఫ్ పోలీస్ రీసెర్చ్ అండ్ డెవలప్మెంట్, సీఐఎస్ఎఫ్ (CISF) లలో ఐజీగా పనిచేయడమే కాకుండా, 1984 సిక్కుల ఊచకోతపై కేంద్ర హోం శాఖ నియమించిన ప్రత్యేక విచారణ బృందానికి (SIT) చీఫ్గా వ్యవహరించారు.
అనురాగ్ ధన్ఖడ్ కేంద్ర దర్యాప్తు సంస్థ అయిన సీబీఐ (CBI) లో సుదీర్ఘ కాలం పాటు ఎస్పీ, డీఐజీ, జాయింట్ డైరెక్టర్ మరియు అడిషనల్ డైరెక్టర్ వంటి అత్యున్నత స్థాయి బాధ్యతలను నిర్వహిస్తూ పలు కీలక కేసుల దర్యాప్తును విజయవంతంగా పూర్తి చేశారు. రాష్ట్రంలోనే అత్యంత అనుభవజ్ఞుడైన ఒక టాప్ ఐపీఎస్ అధికారి పోలీస్ ప్రధాన కార్యాలయంలోనే ఇలా ఆత్మహత్యకు పాల్పడటం దేశవ్యాప్తంగా ఉన్న పోలీస్ వర్గాలను, ప్రభుత్వ ఉన్నతాధికారులను తీవ్ర దిగ్భ్రాంతికి గురిచేసింది. ఆయన ఆత్మహత్యకు దారితీసిన కచ్చితమైన కారణాలు ఇంకా వెల్లడి కాలేదు. ప్రస్తుతం ఈ హైప్రొఫైల్ మరణంపై అక్కడి ప్రభుత్వం పూర్తి స్థాయి అధికారిక దర్యాప్తునకు ఆదేశించింది.
