దేశంలో నీట్ పరీక్షల పేపర్ లీకేజీ ఘటనలకు నైతిక బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే రాజీనామా చేయాలనే డిమాండ్తో ఢిల్లీలో నిరసనలు ఉద్ధృతమయ్యాయి. ఈ క్రమంలోనే కాక్రోచ్ జనతా పార్టీ (సీజేపీ) వ్యవస్థాపకుడు అభిజీత్ దీప్కే ఆధ్వర్యంలో చేపట్టిన ‘చలో పార్లమెంట్’ (పార్లమెంట్ ముట్టడి) ర్యాలీ తీవ్ర ఉద్రిక్తతలకు దారితీసింది. నిరుద్యోగులు, విద్యార్థులు, సమితి కార్యకర్తలు జంతర్ మంతర్ నుండి పార్లమెంట్ వైపు దూసుకెళ్లేందుకు ప్రయత్నించగా, పోలీసులు బారికేడ్లు వేసి, లాఠీఛార్జ్ మరియు బాష్పవాయువును ప్రయోగించి అడ్డుకున్నారు. ఈ ఆందోళనల నేపథ్యంలో ప్రస్తుతం ఢిల్లీలోని సఫ్దర్జంగ్ ఆస్పత్రిలో చికిత్స పొందుతున్న ప్రముఖ సామాజిక కార్యకర్త సోనమ్ వాంగ్చుక్.. కాక్రోచ్ జనతా పార్టీతో కలిసి పార్లమెంట్ నిరసనలో పాల్గొనేందుకు వీలుగా తనను తాత్కాలికంగా డిశ్చార్జ్ చేయాలని ఆస్పత్రి అధికారులను పట్టుబట్టారు.
సఫ్దర్జంగ్ ఆస్పత్రి మెడికల్ సూపరింటెండెంట్కు సోనమ్ వాంగ్చుక్ ఒక లేఖ రాస్తూ.. ప్రస్తుతం తన ఆరోగ్య పరిస్థితి బాగానే ఉందని, వైద్య పరీక్షల ఫలితాలు కూడా సాధారణంగానే వచ్చాయని పేర్కొన్నారు. అందువల్ల పార్లమెంట్ ముట్టడి కార్యక్రమంలో పాల్గొనేందుకు కొద్దిసేపు బయటకు వెళ్లేందుకు అనుమతించాలని, ఆ నిరసన ముగిసిన అనంతరం తిరిగి ఆస్పత్రికి వస్తానని లేఖలో కోరారు. అయితే, వాంగ్చుక్ చేసిన విజ్ఞప్తిని ఆస్పత్రి వర్గాలు నిరాకరించాయి. ఆయన ఆరోగ్యం ప్రస్తుతం స్థిరంగా ఉన్నప్పటికీ, రక్త పరీక్షల ఫలితాలను ఎప్పటికప్పుడు నిరంతరం పర్యవేక్షించాల్సి ఉందని పేర్కొన్నాయి. ఎయిమ్స్ (AIIMS) మరియు సఫ్దర్జంగ్ వైద్య నిపుణుల బృందం సూచనల మేరకు ఆయనకు వైద్య పర్యవేక్షణ అత్యంత ఆవశ్యకమని ఆస్పత్రి వర్గాలు హెల్త్ బులెటిన్లో స్పష్టం చేశాయి.
మరోవైపు, జంతర్ మంతర్ వద్ద నిరాహార దీక్ష చేస్తున్న తన భర్తను ముందస్తు సమాచారం లేకుండా పోలీసులు బలవంతంగా ఆస్పత్రికి తరలించారని సోనమ్ వాంగ్చుక్ భార్య గీతాంజలి ఆంగ్మో ఆరోపించారు. ఆయనను సఫ్దర్జంగ్ ఆస్పత్రి నుండి తమకు నచ్చిన ప్రైవేట్ ఆస్పత్రికి తరలించేందుకు అనుమతి ఇవ్వాలని కోరుతూ ఆమె ఢిల్లీ హైకోర్టును ఆశ్రయించారు. గతంలో ఈ అభ్యర్థనను తిరస్కరించిన సింగిల్ బెంచ్ నిర్ణయాన్ని సవాల్ చేస్తూ దాఖలైన ఈ అప్పీల్ను అత్యవసరంగా విచారించేందుకు ఢిల్లీ హైకోర్టు ప్రధాన న్యాయమూర్తి జస్టిస్ డీకే ఉపాధ్యాయ నేతృత్వంలోని ధర్మాసనం అంగీకరించింది. ప్రతి పౌరుడికి నచ్చిన ఆస్పత్రిలో చికిత్స పొందే హక్కు ఉంటుందని ఆమె తరఫు న్యాయవాది అఖిల్ సిబల్ కోర్టు దృష్టికి తీసుకెళ్లారు.
