టెక్ దిగ్గజం ఆల్ఫాబెట్ అనుబంధ సంస్థ గూగుల్కు యూరోపియన్ యూనియన్ (ఈయూ) భారీ షాక్ ఇచ్చింది. డిజిటల్ మార్కెట్స్ యాక్ట్ (డీఎంఏ) నిబంధనలను ఉల్లంఘించినందుకు ఏకంగా 890 మిలియన్ యూరోల (సుమారు రూ. 8,200 కోట్లకు పైగా) భారీ జరిమానా విధిస్తూ నిర్ణయం తీసుకుంది. టెక్ కంపెనీల ఆధిపత్యాన్ని అరికట్టే లక్ష్యంతో తీసుకొచ్చిన ఈ నూతన చట్టం కింద గూగుల్పై ఈయూ చర్యలు తీసుకోవడం ఇదే తొలిసారి కావడం గమనార్హం.
ఈ జరిమానాను ఈయూ కమిషన్ రెండు భాగాలుగా విభజించింది. గూగుల్ సెర్చ్ ఫలితాల్లో తమ సొంత సేవలైన షాపింగ్, హోటల్స్, విమాన టికెట్ల వంటి వాటికి అధిక ప్రాధాన్యత ఇస్తూ, పోటీ సంస్థల సేవలను వెనక్కు నెట్టినందుకు గానూ 460 మిలియన్ యూరోల జరిమానా విధించారు. దీనితో పాటు, గూగుల్ ప్లే స్టోర్లో యాప్ డెవలపర్లు తమ వినియోగదారులను ఇతర ఆఫర్ల వైపు మళ్లించకుండా ఆంక్షలు విధించినందుకు మరో 430 మిలియన్ యూరోల జరిమానా విధిస్తున్నట్లు ఈయూ స్పష్టం చేసింది.
ఈయూ తీసుకున్న ఈ నిర్ణయంపై గూగుల్ తీవ్ర అసంతృప్తి వ్యక్తం చేసింది. ఈ కొత్త నిబంధనల వల్ల వినియోగదారుల అనుభవం, భద్రతా ఫీచర్లు దెబ్బతింటాయని పేర్కొన్న సదరు సంస్థ, ఈ తీర్పును సమీక్షిస్తున్నామని మరియు అప్పీలుకు వెళ్లే అవకాశాలను పరిశీలిస్తున్నామని తెలిపింది. కాగా, నిబంధనలకు అనుగుణంగా మార్పులు చేసుకునేందుకు గూగుల్కు 60 రోజుల గడువు ఇచ్చారని, ఒకవేళ ఈ గడువులోగా మార్పులు చేయకపోతే రోజువారీ ప్రపంచ టర్నోవర్లో 5 శాతం వరకు అదనపు జరిమానాలు ఎదుర్కోవాల్సి ఉంటుందని ఈయూ హెచ్చరించింది.
