స్టార్ హీరో సినిమాలో చిన్న పాత్రలోనైనా కనిపించాలని ఎంతోమంది నటీనటులు కలలు కంటారు. అలాంటి అవకాశం వచ్చి, దాదాపు ఏడాది పాటు కష్టపడ్డాక.. చివరి నిమిషంలో ఎడిటింగ్లో ఆ పాత్రను సినిమా నుంచి తొలగిస్తే ఆ బాధ వర్ణనాతీతం. ప్రస్తుతం ఇలాంటి తీవ్ర వేదననే తమిళ నటి ఆనంది అజయ్ అనుభవిస్తున్నారు. దళపతి విజయ్ ప్రధాన పాత్రలో నటించిన ‘జన నాయగన్’ చిత్రం నుంచి తన సన్నివేశాన్ని తొలగించారంటూ ఆమె కన్నీటి పర్యంతమయ్యారు. ఈ మేరకు ఆమె సోషల్ మీడియాలో పోస్ట్ చేసిన ఓ భావోద్వేగ వీడియో ఇప్పుడు ఇండస్ట్రీలో వైరల్ అవుతోంది.
ఈ వీడియోలో ఆనంది కన్నీళ్లు పెట్టుకుంటూ.. “ఈ సినిమా కోసం నేను దాదాపు ఏడాది పాటు కష్టపడి పనిచేశాను. విజయ్ సార్తో కలిసి నటించే అవకాశం రావడం నా జీవితంలోనే అత్యంత సంతోషకరమైన విషయంగా భావించాను. కానీ, ఇప్పుడు సినిమాలో నా సన్నివేశాన్ని తొలగించారు. ఈ విషయం నన్ను తీవ్రంగా బాధిస్తోంది” అని తమిళంలో తన ఆవేదనను పంచుకున్నారు. విజయ్ పూర్తిస్థాయి రాజకీయాల్లోకి వెళ్లనున్న నేపథ్యంలో ఇదే ఆయనకు చివరి సినిమా అని ప్రచారం జరుగుతోంది. ఈ కారణంగా ఆయనతో కలిసి స్క్రీన్ షేర్ చేసుకునే మరో గొప్ప అవకాశం భవిష్యత్తులో తనకు రాదని ఆమె తీవ్ర నిరాశ వ్యక్తం చేశారు.
ఆనంది పోస్ట్ చేసిన ఈ వీడియోకు నెటిజన్లు, దళపతి అభిమానుల నుంచి భారీ స్పందన లభిస్తోంది. చాలామంది ఆమెకు మద్దతుగా నిలుస్తూ కామెంట్ల రూపంలో ధైర్యం చెబుతున్నారు. “ఒక నటిగా మీ బాధను మేము అర్థం చేసుకోగలం, ధైర్యంగా ఉండండి. ఇంతకంటే పెద్ద అవకాశాలు మీ భవిష్యత్తులో ఎదురుచూస్తున్నాయి” అని భరోసా ఇస్తున్నారు. కాగా ఆనంది అజయ్ తమిళ బుల్లితెరపై ‘కార్తిగై పెంగళ్’, ‘యమునా’, ‘కనా కానుమ్ కాలంగళ్’ వంటి పలు విజయవంతమైన టీవీ సీరియల్స్ ద్వారా మంచి గుర్తింపు తెచ్చుకున్నారు. అలాగే ‘డ్యాన్స్ జోడీ డ్యాన్స్ 3.0’, ‘జోడీ నెం.1’ వంటి డ్యాన్స్ రియాలిటీ షోలలో తన ప్రతిభతో ప్రేక్షకులను ఆకట్టుకున్నారు.
