పాకిస్తాన్ ఆక్రమిత కాశ్మీర్ (PoK)లో స్థానిక నిరసనకారులపై ఇస్లామాబాద్ ప్రభుత్వం జరుపుతోన్న హింసాత్మక అణచివేతను సమర్థిస్తూ పాక్ రక్షణ మంత్రి ఖవాజా ఆసిఫ్ సంచలన వ్యాఖ్యలు చేశారు. PoK ఆందోళనకారులను తాను “భారతదేశం లాంటి శత్రువులుగానే” చూస్తున్నానని వ్యాఖ్యానించి ఆయన మరోసారి అంతర్జాతీయంగా వివాదంలో చిక్కుకున్నారు. PoKలోని రావల్కోట్ ప్రాంతంలో గత రెండు రోజులుగా పాకిస్తానీ సైనిక బలగాలు జరిపిన కాల్పుల్లో కనీసం 32 మంది కాశ్మీరీ నిరసనకారులు దారుణంగా హతమవ్వగా, ఈ నెత్తుటి హింసాకాండ నేపథ్యంలోనే రక్షణ మంత్రి నుంచి ఈ బాధ్యతారాహిత్య ప్రకటన వెలువడింది.
“నేను ఆజాద్ కాశ్మీర్ నిరసనకారులను భారతదేశంతో సమానమైన వర్గంలోనే ఉంచుతాను, వారిని కూడా శత్రువులుగానే పరిగణిస్తాను” అంటూ ఖవాజా ఆసిఫ్ మాట్లాడిన వీడియో ఒకటి ప్రస్తుతం ఎక్స్ (ట్విట్టర్) వేదికగా తీవ్ర దుమారం రేపుతోంది. పాక్ ఆక్రమిత కాశ్మీర్లో గత జూన్ 5 నుంచి చెలరేగిన అశాంతి కారణంగా ఇప్పటివరకు దాదాపు 90 మందికి పైగా స్థానికులు ప్రాణాలు కోల్పోయారు. ఈ క్రమంలోనే మీర్పూర్ నగరంలో పాకిస్తానీ భద్రతా సిబ్బంది పౌరులపై బహిరంగంగా తూటాల వర్షం కురిపించడం, ఆపై మృతదేహాలను బలవంతంగా తమ వాహనాల్లోకి ఎక్కించుకుపోవడం వంటి హృదయవిదారక దృశ్యాలకు సంబంధించిన అనేక వీడియోలు సోషల్ మీడియాలో వెలుగులోకి వచ్చాయి.
ఈ దారుణ హత్యలకు గురైన వారిలో ఎక్కువ మంది జాయింట్ అవామీ యాక్షన్ కమిటీ (JAAC)కి చెందిన ప్రతినిధులు, క్రీయాశీలక కార్యకర్తలే ఉన్నారు. ఆ ప్రాంతంలో పాక్ ప్రభుత్వం సాగిస్తోన్న ఘోరమైన మానవ హక్కుల ఉల్లంఘనలను అంతర్జాతీయ సమాజం ముందు ఎత్తి చూపినందుకే ఇస్లామాబాద్ ఈ సంస్థపై ఇప్పటికే నిషేధం విధించింది. మరణించిన వారిలో JAAC వ్యవస్థాపక సభ్యుడైన ఉమర్ నజీర్ తమ్ముడు ఉస్మాన్ నజీర్ కూడా ఉన్నట్లు సమాచారం. ప్రస్తుతం మిర్పూర్, చుర్హోయ్ వంటి ప్రధాన నగరాల్లో వీధులన్నీ రక్తసిక్తంగా మారాయని, తమ హక్కుల కోసం శాంతియుతంగా పోరాడుతున్న పౌరులపై పాక్ బలగాలు క్రూరత్వానికి తెగబడుతున్నాయని JAAC ప్రతినిధులు సామాజిక మాధ్యమాల ద్వారా ఆవేదన వ్యక్తం చేస్తున్నారు.
