ప్రముఖ పౌరాణిక ధారావాహిక ‘రామాయణం’ సృష్టికర్త రామానంద సాగర్ కుటుంబానికి చెందిన సాగర్ పిక్చర్స్ ఎంటర్టైన్మెంట్ సంస్థ నుంచి మరో దృశ్యకావ్యం సిద్ధమవుతోంది. గురుపౌర్ణమి (వ్యాస పౌర్ణమి) పర్వదినాన్ని పురస్కరించుకుని ‘శ్రీమద్ భాగవతం’ ఆధారంగా ఏడు భాగాల భారీ సినిమాటిక్ ఫ్రాంచైజీని మేకర్స్ అధికారికంగా ప్రకటించారు. భాగవత మహాపురాణంలోని ప్రామాణిక కథనంతో అత్యంత ప్రతిష్టాత్మకంగా ఈ చిత్రాలను రూపొందించి, థియేటర్లలో విడుదల చేయనున్నట్లు స్పష్టం చేశారు.
సనాతన సంప్రదాయంలో శతాబ్దాలుగా కొనసాగుతున్న ఏడు రోజుల ‘భాగవత సప్తాహ పారాయణం’ స్ఫూర్తితో ఈ చిత్రాలను ఏడు భాగాలుగా తీర్చిదిద్దుతున్నారు. ఈ ప్రతిష్టాత్మక సిరీస్కు ‘సప్త’ అని నామకరణం చేశారు. ఈ ఫ్రాంచైజీలోని ఏడు భాగాలు ఒకదానికొకటి అనుసంధానమై, ప్రేక్షకులకు సరికొత్త భక్తిరస అనుభూతిని అందించేలా సాగనున్నాయి. రామానంద సాగర్ వారసత్వం నుంచి వస్తున్న ప్రాజెక్ట్ కావడంతో ఇండస్ట్రీతో పాటు ప్రేక్షకుల్లోనూ దీనిపై భారీ అంచనాలు నెలకొన్నాయి.
భారతీయ చలనచిత్ర రంగాన్నే ఆకర్షించేలా ప్లాన్ చేస్తున్న ఈ విజువల్ వండర్ ప్రాజెక్టుకు సంబంధించిన నటీనటులు, దర్శకుడు మరియు ఇతర ప్రొఫెషనల్ సాంకేతిక నిపుణుల వివరాలను సాగర్ పిక్చర్స్ సంస్థ త్వరలోనే అధికారికంగా వెల్లడించనుంది. ప్రస్తుతం ప్రాథమిక పనులు జరుపుకుంటున్న ఈ ‘సప్త’ సిరీస్, భారతీయ పురాణ ఇతిహాసాలను వెండితెరపై సరికొత్త పంథాలో ఆవిష్కరించనుందని సినీ వర్గాలు భావిస్తున్నాయి.
