సైబర్ నేరగాళ్ల బారిన నటి: ప్రముఖ బాలీవుడ్ నటి, నిర్మాత కీర్తి కుల్హారి సైబర్ మోసానికి గురయ్యారు. గుర్తుతెలియని వ్యక్తులు ఆమెకు తెలియకుండానే క్రెడిట్ కార్డును ఉపయోగించి రూ. 2,43,852 మేర అనధికారిక లావాదేవీలు జరపడంతో ఆమె తీవ్ర దిగ్భ్రాంతికి లోనయ్యారు. జూలై 24 రాత్రి జరిగిన ఈ ఆర్థిక మోసంపై అప్రమత్తమైన నటి.. వెంటనే ముంబై పోలీసులను ఆశ్రయించి రాతపూర్వకంగా ఫిర్యాదు చేశారు. దీంతో అంబోలి పోలీస్ స్టేషన్లో కేసు నమోదు కాగా, సిటీ సైబర్ సెల్ అధికారులు దర్యాప్తును ముమ్మరం చేశారు.
నిమిషాల వ్యవధిలోనే మాయం: పోలీసుల కథనం ప్రకారం.. కీర్తి కుల్హారి అంధేరి వెస్ట్లోని ఒక మల్టీప్లెక్స్ వద్ద ఉన్న సమయంలో ఆమె మొబైల్ ఫోన్కు బ్యాంక్ నుంచి హఠాత్తుగా ఒక అలర్ట్ మెసేజ్ వచ్చింది. అందులో ఆమె క్రెడిట్ కార్డు ద్వారా ‘ఏరోమెక్సికో ఎయిర్లైన్స్’ (Aeroméxico) లో 2,525 యూఎస్ డాలర్ల విలువైన లావాదేవీ జరిగినట్లు ఉండటంతో ఆమె తక్షణమే బ్యాంక్ కస్టమర్ కేర్ను సంప్రదించారు. అధికారులు పరిశీలించగా.. కేవలం నిమిషాల వ్యవధిలోనే వరుసగా నాలుగు అనధికారిక ట్రాన్సాక్షన్స్ జరిగాయని తేలింది. దీంతో మరింత నష్టం జరగకుండా బ్యాంక్ సిబ్బంది ఆ కార్డును వెంటనే బ్లాక్ చేశారు.
ఫోన్ హ్యాక్ అయిందనే అనుమానాలు: తాను ఎవరికీ తన క్రెడిట్ కార్డు పిన్ (PIN), పాస్వర్డ్ లేదా ఓటీపీ (OTP) వంటి ఎలాంటి రహస్య వివరాలను పంచుకోలేదని కీర్తి కుల్హారి పోలీసులకు ఇచ్చిన వాంగ్మూలంలో స్పష్టం చేశారు. దీంతో సైబర్ నేరగాళ్లు ఏదైనా మాల్వేర్, స్పైవేర్ లేదా నకిలీ ఫిషింగ్ లింక్స్ ద్వారా ఆమె మొబైల్ ఫోన్ను లేదా కార్డు వివరాలను హ్యాక్ చేసి ఉంటారని పోలీసులు ప్రాథమికంగా అనుమానిస్తున్నారు. ‘పింక్’, ‘యూరి’, ‘మిషన్ మంగళ్’ వంటి సూపర్ హిట్ సినిమాలతో పాటు ‘ఫోర్ మోర్ షాట్స్ ప్లీజ్!’, ‘స్కూప్’ వంటి వెబ్ సిరీస్ల ద్వారా కీర్తి దేశవ్యాప్తంగా మంచి గుర్తింపు తెచ్చుకున్న సంగతి తెలిసిందే.
