ఆమ్ ఆద్మీ పార్టీ (AAP) ని వీడి భారతీయ జనతా పార్టీ (BJP) లో చేరిన యువ ఎంపీ రాఘవ్ చద్ధా.. దేశవ్యాప్తంగా సంచలనం సృష్టించిన నీట్ (NEET) ప్రశ్నాపత్రాల లీకేజీ వ్యవహారంపై ఎట్టకేలకు తన మౌనాన్ని వీడారు. విద్యార్థులు ఢిల్లీ వీధుల్లో నెలల తరబడి ఆందోళనలు చేస్తున్నా ఈ యువ నాయకుడు స్పందించకపోవడంపై సోషల్ మీడియాలో తీవ్ర విమర్శలు, ఎగతాళి వ్యక్తమయ్యాయి. ఈ నేపథ్యంలో, దాదాపు రెండు నెలల సుదీర్ఘ విరామం తర్వాత రాజ్యసభలో పేపర్ లీకేజీల నిరోధక బిల్లుపై జరిగిన చర్చలో పాల్గొన్న ఆయన, తన నిశ్శబ్దానికి గల కారణాలను వివరిస్తూ విమర్శకులకు గట్టి కౌంటర్ ఇచ్చారు.
రాజకీయ మార్పు తర్వాత పార్లమెంట్లో తన పాత్ర పూర్తిగా మారిపోయిందని రాఘవ్ చద్ధా ఈ సందర్భంగా స్పష్టం చేశారు. “గతంలో నేను ప్రతిపక్షంలో ఉన్నప్పుడు ప్రభుత్వంపై ప్రశ్నలు లేవనెత్తడం నా బాధ్యత, దానిని నేను నిజాయితీగా నిర్వర్తించాను. కానీ ఇప్పుడు నేను అధికార పక్షంలో ఉన్నాను. కాబట్టి నా బాధ్యత కేవలం ప్రశ్నలు అడగడమే కాదు, సమస్యలకు పరిష్కారాలు చూపించడం” అని ఆయన పేర్కొన్నారు. హెడ్లైన్స్ కోసం లేదా కెమెరాల ముందు హడావుడి చేయడం తనకు ఇష్టం లేదని, కేవలం ఫలితాలు సాధించడమే తన అంతిమ లక్ష్యమని చద్ధా స్పష్టం చేశారు.
వ్యవస్థను ప్రక్షాళన చేసే చారిత్రాత్మక బిల్లును కేంద్రం ప్రవేశపెట్టినందుకే తాను ఈరోజు సభలో మాట్లాడుతున్నానని ఆయన తెలిపారు. క్రొసిన్ (Crocin) టాబ్లెట్తో క్యాన్సర్ మహమ్మారికి చికిత్స చేయలేనట్లే, కేవలం మాటలతో పేపర్ లీకుల ముప్పును అరికట్టలేమని, ఇందుకోసం తమ ప్రభుత్వం విప్లవాత్మకమైన సంస్థాగత సంస్కరణలను ప్రారంభించిందని ప్రశంసించారు. నీట్ విద్యార్థుల ఆగ్రహం, ఆవేదనలో న్యాయముందని పేర్కొన్న చద్ధా.. విద్యార్థులు డిమాండ్ చేసిన వెంటనే ప్రధానమంత్రి నరేంద్ర మోదీ ఒక కుటుంబ పెద్దలా స్పందించి కఠినమైన చట్టాన్ని తీసుకురావడంలో కీలక పాత్ర పోషించారని కొనియాడారు.
