పాకిస్థాన్లో తీవ్రమైన ఆర్థిక సంక్షోభం, నిరుద్యోగం, మరియు భద్రతా సవాళ్లు నెలకొన్న తరుణంలో ఆ దేశ హోంశాఖ మంత్రి మొహ్సిన్ నఖ్వీ సంచలన వ్యాఖ్యలు చేశారు. ఇస్లామాబాద్లో జరిగిన ‘పాకిస్థాన్ ఎకనామిక్ సమిట్’లో ఆయన ప్రసంగిస్తూ, దేశంలో ప్రస్తుతం ఉన్న పరిపాలనా వ్యవస్థ పూర్తిగా కుప్పకూలిందని నిప్పులు చెరిగారు. పొరుగు దేశమైన భారతదేశంలో ఇటీవల చోటుచేసుకున్న జెన్ జీ (Gen Z) ఉద్యమాలు మరియు సామాజిక మార్పుల నేపథ్యాన్ని ప్రస్తావిస్తూ, నిర్వీర్య దశలో ఉన్న పాక్ యువతను ఉద్దేశించి ఆయన తీవ్ర వ్యాఖ్యలు చేశారు. యువతను ఏ పేరుతో పిలిచినా (యువకుడా, కాక్రోచా లేదా ఇంకేదైనా), ఆ ‘కాక్రోచ్లు’ గనుక ఒక్కటైతే ఎలాంటి వ్యవస్థనైనా మార్చగల సామర్థ్యం వారికి ఉంటుందని మరియు ఏ రాజకీయ లేదా సామాజిక మార్పైనా సాధ్యమేనని ఆయన అభిప్రాయపడ్డారు.
దేశంలో సూక్ష స్థాయి నుంచి సంస్థాగత సంస్కరణలు వెంటనే చేపట్టకపోతే, మరో పదేళ్ల తర్వాత కూడా పాకిస్థాన్ ఇలాంటి క్లిష్ట పరిస్థితుల్లోనే కొట్టుమిట్టాడుతుందని నఖ్వీ తీవ్రంగా హెచ్చరించారు. దేశంలోని సమస్యలన్నింటినీ కేవలం మిలిటరీ నాయకత్వంతోనో లేదా ఆర్మీ చీఫ్ అసద్ మునీర్ చర్యలతోనో పూర్తిగా పరిష్కరించలేమని ఆయన కుండబద్దలు కొట్టారు. కేవలం సంక్షేమ పథకాల రూపంలో కొన్ని వేల రూపాయల ఉపకార వేతనాలు (స్టైపెండ్లు) లేదా టాబ్లెట్లు పంపిణీ చేసినంత మాత్రాన యువత సంతృప్తి చెందదని, వారు కోరుకునేది పారదర్శకమైన, ప్రతిభాధారిత (మెరిట్) ఉద్యోగావకాశాలు మాత్రమేనని తేల్చి చెప్పారు.
ముఖ్యంగా బలోచిస్తాన్, ఖైబర్ ఫఖ్తుంఖ్వా వంటి సరిహద్దు ప్రాంతాల్లో రోజురోజుకూ క్షీణిస్తున్న భద్రతా పరిస్థితులు మరియు నిరుద్యోగంపై తక్షణ చర్యలు అవసరమని హోంమంత్రి నొక్కి చెప్పారు. ప్రధాని షెహబాజ్ షరీఫ్ రోజుకు 12 నుండి 14 గంటల పాటు కష్టపడుతున్నప్పటికీ, ప్రభుత్వం కేవలం తాత్కాలిక సమస్యల నివారణకే (ఫైర్ ఫైటింగ్) పరిమితమవుతోందని విమర్శించారు. ఇప్పటికైనా అన్ని రాజకీయ పార్టీలు ఒకే చోట కూర్చుని పరిపాలనా వికేంద్రీకరణతో పాటు కొత్త రాష్ట్రాలు లేదా అడ్మినిస్ట్రేటివ్ యూనిట్ల ఏర్పాటుపై సమగ్ర రాజ్యాంగ సంస్కరణలు చేపట్టకపోతే దేశ భవిష్యత్తు అంధకారమవుతుందని నఖ్వీ హెచ్చరించారు.
