లాల్దర్వాజా సింహవాహిని మహంకాళి బోనాల వేడుకల సందర్భంగా రాష్ట్ర బీసీ సంక్షేమ, రవాణా శాఖ మంత్రి పొన్నం ప్రభాకర్ జోగినుల సంక్షేమం కోసం పలు కీలక ప్రకటనలు చేశారు. జోగినులకు సమాజంలో సముచిత గుర్తింపు, గౌరవం కల్పించే దిశగా ప్రభుత్వం సానుకూలంగా అడుగులు వేస్తోందని ఆయన స్పష్టం చేశారు. తెలంగాణ సంస్కృతి, విశిష్ట సంప్రదాయాలకు ప్రతీకగా నిలిచే బోనాల జాతరను ప్రభుత్వం ఎంతో ప్రతిష్టాత్మకంగా నిర్వహించిందని చెబుతూ.. అమ్మవారి ఆశీస్సులతో రాష్ట్రంలో వర్షాలు సమృద్ధిగా కురిసి, ప్రజలంతా సుఖసంతోషాలతో వర్ధిల్లాలని మంత్రి ఆకాంక్షించారు.
మంత్రి పొన్నం ప్రభాకర్ తన ప్రకటనలో ప్రధానంగా రెండు కీలకమైన అంశాలను వెల్లడించారు. అందులో మొదటిది, జోగినులకు సమాజంలో ప్రత్యేక గుర్తింపునిస్తూ ప్రభుత్వం అధికారికంగా ఐడెంటిటీ కార్డులను (ID Cards) జారీ చేయనుంది. రెండవది, భవిష్యత్తులో స్థానిక సంస్థల పరిపాలనలో వారికి తగిన ప్రాధాన్యత కల్పిస్తూ, మున్సిపాలిటీల్లో కో-ఆప్షన్ సభ్యులుగా నియమించే అంశాన్ని ప్రభుత్వం తీవ్రంగా పరిశీలిస్తోందని మంత్రి పేర్కొన్నారు. ఈ నిర్ణయాల ద్వారా జోగినుల జీవితాల్లో సామాజిక భద్రతతో పాటు రాజకీయ భాగస్వామ్యం కూడా పెరుగుతుందని ఆశాభావం వ్యక్తం చేశారు.
భవిష్యత్తులో జోగినులకు ఎలాంటి ఇబ్బందులు ఎదురుకాకుండా రాష్ట్ర ప్రభుత్వం అన్నివిధాలా అండగా ఉంటుందని మంత్రి పొన్నం ప్రభాకర్ భరోసా కల్పించారు. లాల్దర్వాజా బోనాలకు అమ్మవారి దర్శనం కోసం భక్తులు భారీ సంఖ్యలో తరలివచ్చినప్పటికీ, అధికారుల సమన్వయంతో ఎవరికీ ఎలాంటి అసౌకర్యం కలగకుండా అన్ని ఏర్పాట్లు చేశామని కొనియాడారు. రాబోయే రోజుల్లో దేవాదాయ, హోమ్, మున్సిపల్ శాఖల ఉమ్మడి సమన్వయంతో బోనాల ఉత్సవాలను మరింత వైభవంగా నిర్వహిస్తామని ఈ సందర్భంగా మంత్రి స్పష్టం చేశారు.
