ప్రముఖ పుణ్యక్షేత్రమైన కాణిపాకం శ్రీ వరసిద్ధి వినాయక స్వామి ఆలయ ప్రాంగణంలో మెగా హీరో సాయి దుర్గా తేజ్ కేక్ కట్ చేయడం తీవ్ర వివాదాస్పదమైంది. మెగాస్టార్ చిరంజీవి పుట్టినరోజు (ఆగస్టు 22) సమీపిస్తున్న సందర్భంగా ఆలయ వసతి గృహంలో (గెస్ట్హౌస్) అభిమానులతో కలిసి ఆయన ఈ వేడుక నిర్వహించారు. ఇందుకు సంబంధించిన ఫోటోలు, వీడియోలు సోషల్ మీడియాలో వైరల్ కావడంతో నెటిజన్లు, పలువురు భక్తుల నుంచి తీవ్ర అభ్యంతరాలు వ్యక్తమవుతున్నాయి.
పవిత్రమైన పుణ్యక్షేత్రాల ప్రాంగణంలో ఇలాంటి వ్యక్తిగత వేడుకలు నిర్వహించి ఆలయ సంప్రదాయాలను ఉల్లంఘించారని కొందరు భక్తులు మండిపడుతున్నారు. సాధారణ భక్తులకు కఠిన నిబంధనలు అమలు చేసే ఆలయ పాలకమండలి, ప్రముఖుల విషయంలో ఇలాంటి కార్యక్రమాలకు ఎలా అనుమతి ఇచ్చిందని అధికారుల తీరుపై కూడా ప్రశ్నలు వెల్లువెత్తుతున్నాయి.
మరోవైపు సాయి తేజ్ అభిమానులు ఆయనకు మద్దతుగా స్పందిస్తున్నారు. ప్రధాన ఆలయం లోపల కాకుండా కేవలం గెస్ట్హౌస్లో అభిమానుల కోరిక మేరకే సాధారణంగా కేక్ కట్ చేశారని, దీనిని అనవసరంగా రాద్ధాంతం చేయవద్దని స్పష్టం చేస్తున్నారు. అయితే ఆలయ పవిత్రత, నిబంధనల ఉల్లంఘనపై చెలరేగిన ఈ వివాదంపై దేవస్థానం అధికారులు ఇంకా అధికారిక వివరణ ఇవ్వాల్సి ఉంది.
