తెలంగాణను దేశంలోనే అగ్రగామి పారిశ్రామిక, పెట్టుబడుల గమ్యస్థానంగా తీర్చిదిద్దడమే ప్రజా ప్రభుత్వ ప్రధాన లక్ష్యమని ముఖ్యమంత్రి రేవంత్ రెడ్డి స్పష్టం చేశారు. హైదరాబాద్‌లోని హైటెక్స్‌లో నిర్వహించిన ‘సమాఖ్య’ బిజినెస్ సమ్మిట్‌లో పాల్గొన్న ఆయన, రాష్ట్ర అభివృద్ధి ప్రణాళికలు, పారిశ్రామిక విధానాలు, ఉపాధి కల్పనపై సమగ్రంగా మాట్లాడారు. రాష్ట్రానికి వచ్చే పారిశ్రామికవేత్తలకు ప్రభుత్వం పూర్తిస్థాయిలో అండగా ఉంటుందని, పరిశ్రమల స్థాపనకు అవసరమైన భూమి, రాయితీలు, మౌలిక వసతులు కల్పించి వేగవంతమైన అనుమతులు మంజూరు చేస్తామని భరోసా ఇచ్చారు.
తమ కాంగ్రెస్ ప్రభుత్వానికి ఎలాంటి ‘పాలసీ పెరాలసిస్’ లేదని సీఎం రేవంత్ రెడ్డి కుండబద్దలు కొట్టారు. గత మూడు దశాబ్దాలుగా అమలులో ఉన్న మంచి పారిశ్రామిక విధానాలను రద్దు చేయకుండా కొనసాగిస్తున్నామని, రాష్ట్ర పురోగతికి అవసరమైన నూతన సంస్కరణలను ధైర్యంగా ముందుకు తీసుకెళ్తున్నామని వివరించారు. ‘తెలంగాణ రైజింగ్ పాలసీ’ ద్వారా కొత్త పెట్టుబడులను ఆకర్షించడమే కాకుండా, యువ పారిశ్రామికవేత్తలకు విస్తృత అవకాశాలు కల్పిస్తున్నామని పేర్కొంటూ.. అంతర్జాతీయ పెట్టుబడులకు తెలంగాణను తమ ప్రధాన కేంద్రంగా ఎంచుకోవాలని ఆహ్వానించారు.
దేశ జనాభాలో తెలంగాణ వాటా కేవలం 2.5 శాతం మాత్రమే ఉన్నప్పటికీ, జాతీయ జీడీపీకి రాష్ట్రం ఏకంగా 5 శాతం వరకు తోడ్పాటు అందిస్తోందని సీఎం గర్వంగా గుర్తుచేశారు. రాబోయే రోజుల్లో ఈ ఆర్థిక వాటాను మరింత పెంచే దిశగా తయారీ, సేవా రంగాలను పరుగులు పెట్టిస్తామని ధీమా వ్యక్తం చేశారు. ప్రభుత్వ లక్ష్యాలు విజయవంతం కావాలంటే ప్రభుత్వ ప్రణాళికలతో పాటు పారిశ్రామిక దిగ్గజాలు, యువ ఔత్సాహిక వ్యాపారవేత్తల భాగస్వామ్యం అత్యంత కీలకమని, పెట్టుబడులకు ఎలాంటి ఇబ్బంది లేని సురక్షిత వాతావరణాన్ని రాష్ట్రంలో నిరంతరం కొనసాగిస్తామని ఆయన స్పష్టం చేశారు.
