మాజీ ముఖ్యమంత్రి, బీఆర్ఎస్ అధినేత కేసీఆర్, ఆ పార్టీ వర్కింగ్ ప్రెసిడెంట్ కేటీఆర్, సీనియర్ నేత హరీశ్ రావులకు న్యాయస్థానంలో భారీ ఊరట లభించింది. తెలంగాణ మలిదశ ఉద్యమ సమయంలో వారిపై నమోదైన పాత కేసులను తెలంగాణ హైకోర్టు తాజాగా కొట్టివేస్తూ తీర్పునిచ్చింది. ఈ పరిణామంతో బీఆర్ఎస్ అగ్ర నాయకత్వానికి న్యాయపరంగా పెద్ద ఉపశమనం దక్కినట్లయింది.
2011లో ప్రత్యేక తెలంగాణ రాష్ట్ర ఆకాంక్షను చాటుతూ హైదరాబాద్లోని ట్యాంక్బండ్పై భారీ ఎత్తున ‘మిలియన్ మార్చ్’ కార్యక్రమాన్ని నిర్వహించిన విషయం తెలిసిందే. ఆ సమయంలో ట్యాంక్బండ్ పరిసరాల్లో తీవ్ర ఉద్రిక్త పరిస్థితులు చోటు చేసుకున్నాయి. ఆ ఘటనలకు సంబంధించి అప్పట్లో పోలీసులు పలువురిపై కేసులు నమోదు చేసి, దర్యాప్తు చేపట్టారు.
ఆ మిలియన్ మార్చ్ ఉద్రిక్తతల వ్యవహారంలో పోలీసులు కేసీఆర్, కేటీఆర్, హరీశ్ రావులను కూడా నిందితులుగా చేర్చారు. అయితే, తాజాగా ఈ కేసు విచారణ సందర్భంగా.. ఆనాటి ఘటనలతో వీరికి ఎలాంటి సంబంధం లేదని పిటిషనర్ల తరఫు న్యాయవాది కోర్టులో బలమైన వాదనలు వినిపించారు. ఈ వాదనలు విన్న న్యాయస్థానం వారితో ఏకీభవిస్తూ.. కేసీఆర్, కేటీఆర్, హరీశ్ రావులపై నమోదైన కేసులను కొట్టివేసింది.
