మాజీ మంత్రి, బీఆర్ఎస్ ఎమ్మెల్యే మల్లారెడ్డి కుటుంబం పార్టీ మారుతున్నారంటూ గత కొన్ని రోజులుగా జరుగుతున్న ప్రచారానికి ఆయన కోడలు ప్రీతిరెడ్డి స్వస్తి పలికారు. ఇటీవల ఆమె బీజేపీ రాష్ట్ర కార్యాలయంలో ఆ పార్టీ ముఖ్య నేతలను కలవడంతో రాజకీయ వర్గాల్లో చర్చ మొదలైంది. అయితే, తాము బీజేపీలో చేరుతున్నట్లు వస్తున్న వార్తలను ఆమె పూర్తిగా ఖండించారు. కేవలం తమ విద్యాసంస్థల అభివృద్ధికి సంబంధించిన కార్యక్రమాల కోసమే ఇతర పార్టీల నేతలను కలుస్తున్నానని స్పష్టం చేశారు.
తమ యూనివర్సిటీలో నూతనంగా ఏర్పాటు చేసిన ఏఐ (AI) క్యాంపస్ ప్రారంభోత్సవానికి ప్రధానమంత్రి నరేంద్ర మోదీని ఆహ్వానించాలనే ఉద్దేశంతోనే బీజేపీ నేతలను కలిసినట్లు ప్రీతిరెడ్డి వివరించారు. ప్రధానిని ఆహ్వానిస్తున్నప్పుడు సహజంగానే ఆ పార్టీ నాయకులతో సమన్వయం చేసుకోవాల్సి ఉంటుందని, అందుకే ఈ భేటీలు జరిగాయని తెలిపారు. రెండు రోజుల కిందట మల్లారెడ్డి కుటుంబం కేంద్రమంత్రి కిషన్ రెడ్డి ఆధ్వర్యంలో ప్రధాని మోదీని కూడా కలిసిన విషయాన్ని ఆమె ఈ సందర్భంగా గుర్తు చేశారు.
మల్లారెడ్డి పార్టీ మారుతున్నారంటూ సోషల్ మీడియాలో వస్తున్న వార్తల్లో ఎంతమాత్రం నిజం లేదని, ఆయన బీఆర్ఎస్ ఎమ్మెల్యేగానే కొనసాగుతున్నారని ప్రీతిరెడ్డి తేల్చి చెప్పారు. తమకు బీఆర్ఎస్ పార్టీ మరియు నాయకత్వంపై పూర్తి గౌరవం ఉందని పేర్కొన్నారు. విద్యావేత్తగా తమ యూనివర్సిటీ కార్యక్రమాల నిమిత్తం ఇటీవల మంత్రి శ్రీధర్ బాబును కూడా కలిశానని, ఇలా అన్ని పార్టీల ప్రముఖులను కలవడం సాధారణ ప్రక్రియేనని ఆమె క్లారిటీ ఇచ్చారు. దీంతో మల్లారెడ్డి కుటుంబం కాంగ్రెస్ లేదా బీజేపీలోకి వెళ్తుందంటూ వస్తున్న ఊహాగానాలకు తెరపడింది.
