ఛత్తీస్గఢ్లో మావోయిస్టులు అమర్చిన మందుపాతరలను తొలగించే క్రమంలో జరిగిన ప్రమాదంలో ముగ్గురు డిస్ట్రిక్ట్ రిజర్వ్ గార్డ్ (DRG) జవాన్లు ప్రాణాలు కోల్పోయారు. కాంకేర్ మరియు నారాయణ్పూర్ జిల్లాల సరిహద్దు అటవీ ప్రాంతంలోని ఛోటే బేతియా పోలీస్ స్టేషన్ పరిధిలో భద్రతా బలగాలు ఏరియా డామినేషన్ ఆపరేషన్ నిర్వహిస్తుండగా ఈ పేలుడు సంభవించింది. ఈ దుర్ఘటనలో ఇన్స్పెక్టర్ సుఖ్రామ్ వట్టి, కానిస్టేబుళ్లు కృష్ణ కోమ్రా, సంజయ్ గఢ్పాలే వీరమరణం పొందగా, మరో జవాను తీవ్రంగా గాయపడ్డారు.
ఈ ఘటనపై బస్తర్ రేంజ్ ఐజీ సుందర్రాజ్ పట్టిలింగం స్పందిస్తూ, బాంబును నిర్వీర్యం చేస్తున్న సమయంలో ఊహించని విధంగా పేలుడు జరగడం దురదృష్టకరమని విచారం వ్యక్తం చేశారు. నిఘా వర్గాల సమాచారం మేరకు గతంలో వందలాది ఐఈడీలను విజయవంతంగా తొలగించామని, అయితే తాజా ప్రమాదంలో జవాన్ల ప్రాణాలు పోవడం బాధాకరమని ఆయన పేర్కొన్నారు. వీరమరణం పొందిన జవాన్ల త్యాగం వృధా పోదని ఆయన భరోసా ఇచ్చారు.
ఛత్తీస్గఢ్ను సాయుధ మావోయిస్టు రహిత రాష్ట్రంగా ప్రకటించిన తర్వాత జరిగిన తొలి ప్రధాన పేలుడు ఇదే కావడంతో భద్రతా దళాలు అప్రమత్తమయ్యాయి. స్థానిక యువతతో కూడిన డీఆర్జీ దళాలు అటవీ ప్రాంతాల్లో మావోయిస్టు వ్యతిరేక పోరాటంలో కీలక పాత్ర పోషిస్తున్నాయి. ఈ సంఘటన నేపథ్యంలో అటవీ ప్రాంతాల్లో మందుపాతరల వేట కోసం తనిఖీలను మరింత ముమ్మరం చేసినట్లు అధికారులు వెల్లడించారు.
