పాక్ మధ్యవర్తిత్వంతో శాంతి ప్రతిపాదనలు: పశ్చిమాసియాలో గత కొంతకాలంగా కొనసాగుతున్న ఇరాన్-అమెరికా యుద్ధానికి ముగింపు పలికే దిశగా అంతర్జాతీయ వేదికపై ఒక కీలక పరిణామం చోటుచేసుకుంది. అమెరికాతో శాంతి చర్చలను పునరుద్ధరించేందుకు ఇరాన్ ఒక సవరించిన నూతన ప్రతిపాదనను పంపింది. ఇరు దేశాల మధ్య ప్రధాన మధ్యవర్తిగా వ్యవహరిస్తున్న పాకిస్థాన్ ద్వారా ఈ ప్రతిపాదనను వాషింగ్టన్కు చేరవేసినట్లు అంతర్జాతీయ వార్తా సంస్థ రాయిటర్స్ వెల్లడించింది. ప్రస్తుతం ఇరు దేశాల మధ్య తాత్కాలిక కాల్పుల విరమణ అమల్లో ఉన్నప్పటికీ, చర్చలు ఒక కొలిక్కి రావడానికి సమయం మించిపోతోందని మధ్యవర్తిత్వ వర్గాలు ఆందోళన వ్యక్తం చేస్తున్నాయి.
అమెరికా కఠిన షరతులపై ఇరాన్ అసంతృప్తి: అమెరికా పంపిన శాంతి ప్రతిపాదనలపై తాము స్పందించామని, ఇరు దేశాల మధ్య నిరంతరం సందేశాల మార్పిడి జరుగుతోందని ఇరాన్ విదేశాంగ శాఖ ప్రతినిధి ఇస్మాయిల్ బఖాయీ స్పష్టం చేశారు. అయితే, అమెరికా పెట్టిన డిమాండ్లు మితిమీరి ఉన్నాయని ఇరాన్ మీడియా వర్గాలు అసంతృప్తి వ్యక్తం చేస్తున్నాయి. యుద్ధ నష్టపరిహారాన్ని చెల్లించడానికి నిరాకరించడం, అలాగే ఇరాన్ కేవలం ఒకే ఒక్క అణు కేంద్రాన్ని మాత్రమే కలిగి ఉండాలంటూ అమెరికా విధిస్తున్న కఠినమైన షరతులు ఈ చర్చల పురోగతికి ప్రధాన అడ్డంకిగా మారాయని ఇరాన్ అధికారిక సంస్థలు పేర్కొంటున్నాయి.
ఇరాన్ను హెచ్చరించిన డొనాల్డ్ ట్రంప్: ఈ పరిణామాలు ఇలా ఉంచితే, అమెరికా అధ్యక్షుడు డొనాల్డ్ ట్రంప్ ఇరాన్కు తీవ్ర హెచ్చరికలు జారీ చేశారు. “ఇరాన్కు సమయం మించిపోతోంది, వారు ఒప్పందం కోసం వేగంగా కదలాలి, లేదంటే ఏమీ మిగలదు” అంటూ తన ట్రూత్ సోషల్ ఖాతాలో పోస్ట్ చేశారు. ఇరాన్ ఒప్పందం కోసం ఆరాటపడుతున్నట్లు నటిస్తూ కాలయాపన చేస్తోందని ఆయన అసహనం వ్యక్తం చేశారు. ఈ ఏడాది ఫిబ్రవరి 28న ప్రారంభమైన ఈ భీకర యుద్ధం.. ప్రస్తుతం జరుగుతున్న అంతర్జాతీయ దౌత్య ప్రయత్నాలతో శాంతియుతంగా ముగుస్తుందో లేదో వేచి చూడాలి.
