బండి సంజయ్ కుమారుడు బండి భగీరథ్పై నమోదైన పోక్సో (POCSO) కేసులో పోలీసులు చట్టప్రకారం, నిబంధనలకు లోబడి దర్యాప్తు చేస్తున్నారని తెలంగాణ ముఖ్యమంత్రి ఎనుముల రేవంత్ రెడ్డి స్పష్టం చేశారు. బాధితుల నుంచి ఫిర్యాదు అందిన వెంటనే పోలీసులు స్పందించి, తగిన చట్టపరమైన చర్యలు తీసుకున్నారని ఆయన వెల్లడించారు. భగీరథ్ పోలీసుల ముందు లొంగిపోయాడంటూ వస్తున్న వార్తలను సీఎం ఖండించారు. పోలీసుల సాధారణ వాహన తనిఖీల్లోనే బండి భగీరథ్ దొరికాడని, అధికారులు తనకు అందించిన అధికారిక సమాచారాన్నే తాను నమ్ముతానని, బండి సంజయ్ చెప్పే మాటలను కాదని రేవంత్ రెడ్డి వ్యాఖ్యానించారు. గురువారం సచివాలయంలో జరిగిన మీడియా సమావేశంలో ఆయన ఈ వివరాలను పంచుకున్నారు.
ఈ సందర్భంగా ముఖ్యమంత్రి రేవంత్ రెడ్డి ప్రతిపక్ష బీఆర్ఎస్ నేతలపై తీవ్ర ఆగ్రహం వ్యక్తం చేశారు. బీఆర్ఎస్ వర్కింగ్ ప్రెసిడెంట్ కేటీఆర్, ఆ పార్టీ ప్రధాన కార్యదర్శి ఆర్ఎస్ ప్రవీణ్ కుమార్లు ఈ కేసులో తామే స్వయంగా జడ్జీలుగా మారిపోయి, ముందే తీర్పులు ఇస్తున్నారంటూ మండిపడ్డారు. దేశ చట్టాల ప్రకారం పోక్సో కేసుల్లో బాధితుల వివరాలను, ఫొటోలను లేదా వీడియోలను ఎట్టిపరిస్థితుల్లోనూ బహిర్గతం చేయకూడదనే కఠిన నిబంధన ఉందని సీఎం గుర్తు చేశారు. కానీ బీఆర్ఎస్ నేతలు తమ రాజకీయ లబ్ధి కోసం ఒక మైనర్ అమ్మాయిని అడ్డుపెట్టుకుని దిగజారుడు రాజకీయాలకు పాల్పడుతున్నారని ఆయన తీవ్రంగా విమర్శించారు.
బాధ్యత లేకుండా రోడ్డుపై పడి మాట్లాడుతున్న ప్రతిపక్ష నేతల తీరు వల్ల, బాధిత కుటుంబం ఎంతటి మానసిక ఆవేదనకు గురవుతుందో కనీసం ఆలోచించారా? అని సీఎం రేవంత్ రెడ్డి ప్రశ్నించారు. ఈ కేసు విచారణలో ఎలాంటి రాజకీయ ఒత్తిళ్లకు తావులేదని, చట్టం తన పని తాను చేసుకుపోతుందని మరియు బాధితులకు ఖచ్చితంగా న్యాయం జరుగుతుందని ముఖ్యమంత్రి హామీ ఇచ్చారు. బండి భగీరథ్ లొంగిపోయాడని బండి సంజయ్ కుమార్ చెబితే మీడియా ఎలా నమ్ముతుందని ప్రశ్నించిన సీఎం వ్యాఖ్యలు, ప్రస్తుతం తెలంగాణ రాజకీయ వర్గాల్లో పెద్ద ఎత్తున చర్చనీయాంశంగా మారాయి.
