తెలుగుదేశం పార్టీ వ్యవస్థాపకులు, విశ్వవిఖ్యాత నటసార్వభౌమ, మాజీ ముఖ్యమంత్రి స్వర్గీయ నందమూరి తారకరామారావు 103వ జయంతి సందర్భంగా హైదరాబాద్లోని ఎన్టీఆర్ ఘాట్ వద్ద గురువారం ఉదయం విలక్షణ నటుడు, ‘మ్యాన్ ఆఫ్ మాసెస్’ జూనియర్ ఎన్టీఆర్ తన తాతకు ఘనంగా నివాళులర్పించారు. ఉదయమే ఘాట్కు చేరుకున్న తారక్.. సీనియర్ ఎన్టీఆర్ విగ్రహానికి పూలమాల వేసి అంజలి ఘటించారు. అనంతరం అక్కడ నేలపై నిశ్శబ్దంగా కూర్చుని కాసేపు ధ్యానం చేస్తూ, తెలుగు ప్రజల గుండెల్లో చెరగని ముద్ర వేసిన తాతగారి సేవలను, ఆయనతో ఉన్న అనుబంధాన్ని స్మరించుకున్నారు.
జూనియర్ ఎన్టీఆర్ ఘాట్ వద్దకు వస్తున్నారనే సమాచారంతో ఆయనను చూసేందుకు అభిమానులు, సినీ, రాజకీయ ప్రముఖులు భారీ సంఖ్యలో అక్కడికి తరలివచ్చారు. ఎన్టీఆర్ రాకతో ఘాట్ పరిసర ప్రాంతాలన్నీ అభిమానుల కోలాహలంతో సందడిగా మారాయి. ఈ నేపథ్యంలో నెట్టింట వైరల్ అవుతున్న ఒక హృదయపూర్వక దృశ్యం అందరినీ ఆకట్టుకుంటోంది. జూనియర్ ఎన్టీఆర్ను కలవాలనే ఆరాటంలో ఒక అభిమాని ఆయనకు చేయి అందించబోయి, తోపులాటలో ఒక్కసారిగా కిందపడిపోయాడు.
అక్కడ ఉన్న భద్రతా సిబ్బంది వెంటనే స్పందించి ఆ అభిమానిని పక్కకు లాగేసేందుకు ప్రయత్నించినప్పటికీ, హీరో ఎన్టీఆర్ మాత్రం మానవత్వంతో వ్యవహరించారు. సెక్యూరిటీని వారించి, కిందపడ్డ ఆ అభిమానికి స్వయంగా చేయి అందించి పైకి లేపడమే కాకుండా, ఎంతో ఆప్యాయంగా షేక్ హ్యాండ్ ఇచ్చి పలకరించారు. తారక్ చూపించిన ఈ ఉదారతకు సంబంధించిన వీడియోలు ప్రస్తుతం సామాజిక మాధ్యమాల్లో విపరీతంగా వైరల్ అవుతుండటంతో, ఆయన ప్రవర్తనపై నెటిజన్లు మరియు నందమూరి అభిమానులు ప్రశంసల వర్షం కురిపిస్తున్నారు.
