బంగారం, వెండి కొనుగోలు చేయాలనుకునే వారికి మార్కెట్ గట్టి షాక్ ఇచ్చింది. గత పది రోజులుగా పెద్దగా మార్పులు లేకుండా సాగిన పసిడి ధరలు ఒక్కసారిగా భారీగా పెరిగాయి. మంగళవారం ఉదయం నమోదైన మార్కెట్ వివరాల ప్రకారం.. దేశీయంగా 10 గ్రాముల 24 క్యారెట్ల స్వచ్ఛమైన బంగారం ధరపై రూ. 1,470 పెరగగా, అదేవిధంగా 22 క్యారెట్ల ఆర్నమెంట్ బంగారం ధరపై రూ. 1,350 మేర పెరిగింది. అంతర్జాతీయ మార్కెట్లోనూ గోల్డ్ రేటు పుంజుకోవడంతో ఔన్సు బంగారం ధర 15 డాలర్లు పెరిగి, ప్రస్తుతం 4,332 డాలర్ల వద్ద కొనసాగుతోంది.
తెలుగు రాష్ట్రాల్లోని ప్రధాన నగరాలైన హైదరాబాద్, విజయవాడ, విశాఖపట్టణాల్లో ప్రస్తుతం 10 గ్రాముల 24 క్యారెట్ల బంగారం ధర రూ. 1,53,160 కి చేరగా, 22 క్యారెట్ల 10 గ్రాముల బంగారం ధర రూ. 1,40,400 వద్ద కొనసాగుతోంది. దేశ రాజధాని ఢిల్లీలో 24 క్యారెట్ల బంగారం రూ. 1,53,310 గా నమోదు కాగా, ముంబై, కోల్కతా, చెన్నై వంటి మెట్రో నగరాల్లో ఇది మరింత గరిష్టంగా రూ. 1,54,910 కి చేరి పసిడి ప్రియులను కలవరపెడుతోంది. పది రోజులుగా స్థిరంగా సాగిన పసిడి రేట్లు ఒక్కసారిగా పెరగడంతో మార్కెట్లో కొనుగోళ్లు కాస్త మందగించే అవకాశం కనిపిస్తోంది.
మరోవైపు కొద్దిరోజులుగా స్థిరంగా కొనసాగుతూ వస్తున్న వెండి ధరల్లో మాత్రం ఇవాళ ఎలాంటి మార్పూ చోటు చేసుకోలేదు. తెలుగు రాష్ట్రాల్లో (హైదరాబాద్, విజయవాడ, విశాఖపట్టణం) మరియు చెన్నై నగరంలో కిలో వెండి ధర రూ. 2,70,000 వద్దే స్థిరంగా కొనసాగుతోంది. అలాగే ఢిల్లీ, ముంబై, బెంగళూరు నగరాల్లో ప్రస్తుతం కిలో వెండి రేటు రూ. 2,60,000 వద్ద విక్రయించబడుతోంది. అయితే బులియన్ మార్కెట్లో ఉదయం నమోదైన ఈ ధరలు కేవలం ప్రారంభ సూచీలు మాత్రమేనని, అంతర్జాతీయ పరిణామాల బట్టి రోజంతా ఈ రేట్లలో మార్పులు చేర్పులు జరిగే అవకాశం ఉంటుందని మార్కెట్ నిపుణులు గమనించమంటున్నారు.
