మూవీ ఆర్టిస్ట్స్ అసోసియేషన్ (MAA) అధ్యక్షుడు, ప్రముఖ టాలీవుడ్ సినీ నటుడు మంచు విష్ణు మెదక్ జిల్లాలోని చారిత్రక, ఆధ్యాత్మిక పర్యాటక ప్రాంతాలలో పర్యటించారు. శనివారం నాడు ఆయన జిల్లాలోని ప్రసిద్ధ పుణ్యక్షేత్రమైన ఏడుపాయల వన దుర్గా భవాని మాతను సందర్శించి, అమ్మవారికి ప్రత్యేక పూజలు నిర్వహించారు. ఆలయ అర్చకులు ఆయనకు తీర్థప్రసాదాలు అందజేసి ఆశీర్వదించారు. అనంతరం, మెదక్ నగరంలో కాకతీయుల కాలం నాటి చారిత్రక నేపథ్యం కలిగిన మెదక్ ఖిల్లాను సందర్శించి, కోట విశిష్టతను, దాని శిల్పకళా వైభవాన్ని అధికారులను అడిగి తెలుసుకున్నారు. అక్కడి నుండి ఆసియాలోనే అతిపెద్ద చర్చి అయిన మెదక్ సీఎస్ఐ కేథడ్రల్ చర్చిని సందర్శించి, ప్రత్యేక ప్రార్థనల్లో పాల్గొన్నారు.
ఈ సందర్భంగా సినీ నటుడు మంచు విష్ణు మీడియాతో మాట్లాడుతూ మన చారిత్రక వారసత్వంపై కీలక వ్యాఖ్యలు చేశారు. ప్రపంచంలోని 95 శాతం దేశాలకు లేనంతటి అత్యంత అద్భుతమైన, గొప్ప చరిత్ర భారతదేశానికి ఉందని కొనియాడారు. దేశ రాజధానికి సమానమైన హైదరాబాద్ నగరానికి కూతవేటు దూరంలో ఇంతటి అద్భుతమైన చారిత్రక పర్యాటక ప్రాంతం ఉన్నప్పటికీ, ఇప్పటివరకు నేను దీనిని చూడకపోవడం నాకే సిగ్గుచేటు అనిపించిందని, మన చరిత్రను మనం తెలుసుకోవడం చాలా ముఖ్యమని ఆయన పేర్కొన్నారు. ఈ చారిత్రక వారసత్వాన్ని, పర్యాటక కట్టడాలను కాపాడుకోవాల్సిన ఆవశ్యకత మనందరిపై ఎంతైనా ఉందని స్పష్టం చేశారు.
మెదక్ జిల్లాలోని పర్యాటక ప్రాంతాలను అంతర్జాతీయ పర్యాటక కేంద్రాలుగా (Tourism Hubs) అభివృద్ధి చేసేందుకు ఇక్కడి జిల్లా యంత్రాంగం ఇప్పటికే ఒక సమగ్రమైన మాస్టర్ ప్లాన్ సిద్ధం చేసినట్లు విష్ణు వెల్లడించారు. భవిష్యత్తులో తాను హీరోగా నటించే సినిమాల్లో గానీ, లేదా తమ సొంత బ్యానర్లో నిర్మించే చిత్రాలలో గానీ.. కచ్చితంగా మెదక్ పరిసర ప్రాంతాల్లో షూటింగ్ జరుపుకోవడానికి ప్రాధాన్యత ఇస్తానని ప్రకటించారు. దీనితో పాటు, ‘మా’ (MAA) అసోసియేషన్ తరఫున మెదక్ పర్యాటక రంగ అభివృద్ధి మరియు స్థానిక కళాకారుల ప్రోత్సాహం కోసం మెదక్ శాసనసభ్యులు (ఎమ్మెల్యే) మైనంపల్లి రోహిత్ రావుతో కలిసి ఉమ్మడిగా ప్రత్యేకంగా కృషి చేస్తామని మంచు విష్ణు స్పష్టం చేశారు.
