దాయాది దేశం పాకిస్థాన్ తీవ్రమైన ఆర్థిక సంక్షోభం, పెరుగుతున్న ద్రవ్యోల్బణంతో అల్లాడిపోతోంది. గడిచిన ఆరేళ్లలో దేశ ఆర్థిక వ్యవస్థ తీవ్ర ఒడిదొడుకులకు లోనుకావడంతో నిరుపేదల సంఖ్య ప్రమాదకర స్థాయిలో పెరిగిపోయినట్లు తాజా నివేదికలు వెల్లడిస్తున్నాయి. 2018-19 ఆర్థిక సంవత్సరంలో 21.8 శాతంగా ఉన్న పేదరికం, 2024-25 నాటికి ఏకంగా 28.9 శాతానికి చేరిందని, అనగా కేవలం ఆరేళ్ల వ్యవధిలోనే పేదరికం దాదాపు 7 శాతం మేర పెరిగినట్లు ‘డాన్’ పత్రిక విశ్లేషణ స్పష్టం చేస్తోంది.
పట్టణ ప్రాంతాలతో పోలిస్తే గ్రామీణ ప్రాంతాలపై ఈ ఆర్థిక సంక్షోభం ప్రభావం మరింత తీవ్రంగా పడింది. గ్రామీణ పాకిస్థాన్లో పేదరికం సుమారు 8 శాతం పెరగగా, పట్టణ ప్రాంతాల్లో ఇది 6 శాతంగా నమోదైంది. పదేపదే తలెత్తిన చెల్లింపుల సంక్షోభాలు, కొవిడ్ మహమ్మారి, నిత్యావసర వస్తువుల ధరల విపరీతమైన పెరుగుదల వంటి అంశాలు సామాన్య ప్రజల జీవన ప్రమాణాలను, కొనుగోలు శక్తిని పూర్తిగా దెబ్బతీశాయని నివేదిక పేర్కొంది.
ఆర్థిక వృద్ధి నామమాత్రంగా సానుకూలంగా ఉన్నప్పటికీ, ఆ ఫలాలు కేవలం ఉన్నత ఆదాయ వర్గాలకే చేరడంతో దేశంలో ఆదాయ అసమానతలు మరింత పెరిగాయి. రోజువారీ వేతనాలపై ఆధారపడే దిగువ ఆదాయ వర్గాలు ఈ సంక్షోభం వల్ల తీవ్రంగా నష్టపోయాయి. ప్రస్తుత భౌగోళిక రాజకీయ అనిశ్చితులు, బాహ్య ఆర్థిక రిస్కుల మధ్య పెరుగుతున్న పేదరికాన్ని అరికడుతూ ఆర్థిక వ్యవస్థను గాడిలో పెట్టడం పాకిస్థాన్కు ప్రస్తుతం అత్యంత పెను సవాలుగా మారింది.
