ఢిల్లీలో చోటుచేసుకున్న నీట్ ఆందోళనల ఉద్రిక్తతలపై కేంద్ర హోంశాఖ సహాయ మంత్రి బండి సంజయ్ తీవ్రస్థాయిలో ధ్వజమెత్తారు. తెలంగాణ బీజేపీ రాష్ట్ర కార్యాలయంలో మీడియాతో మాట్లాడిన ఆయన… విద్యార్థుల భవిష్యత్తు కోసం కేంద్ర ప్రభుత్వం అహర్నిశలు కృషి చేస్తోందని స్పష్టం చేశారు. నీట్ ఆందోళనల ముసుగులో దేశంలో అరాచకాలు సృష్టించేందుకు కొన్ని కుట్ర శక్తులు ప్రయత్నిస్తున్నాయని, దీని వెనుక విదేశీ కుట్ర కోణం దాగి ఉందని ఆయన సంచలన ఆరోపణలు చేశారు.
ఈ ఘటనపై ప్రధాని మోదీ తీవ్రంగా కలత చెందారని, నిందితులను చట్టం ముందు నిలబెట్టేందుకు ఫాస్ట్ ట్రాక్ కోర్టును ఏర్పాటు చేశామని బండి సంజయ్ తెలిపారు. ఇప్పటికే సీబీఐ విచారణ వేగవంతం చేసి 11 మంది ఫ్యాకల్టీ సహా మొత్తం 17 మందిని అరెస్ట్ చేసిందని చెప్పారు. కేంద్ర విద్యాశాఖ మంత్రి ధర్మేంద్ర ప్రధాన్ కూడా దీనిపై క్షమాపణలు చెప్పారని గుర్తుచేశారు. విద్యార్థుల విద్యా సంవత్సరం ఏమాత్రం వృథా కాకూడదనే ఉద్దేశంతో కేవలం 40 రోజుల్లోనే మళ్లీ పరీక్షలు పూర్తి చేసి ఫలితాలను వెల్లడించామన్నారు. అయితే ఢిల్లీ ఆందోళనల్లో విద్యార్థుల ముసుగులో కమ్యూనిస్టు శక్తులు పార్లమెంట్పై దాడికి కుట్ర పన్నాయని, పోలీసులపై, మహిళా జర్నలిస్టులపై దాడులు చేశాయని మండిపడ్డారు. ఈ హింసలో 118 మంది పోలీసులు గాయపడినా సంయమనం పాటించారని, శాంతిభద్రతల రక్షణ కోసమే లాఠీఛార్జ్ చేయాల్సి వచ్చిందని స్పష్టం చేశారు.
పాకిస్థాన్ అకౌంట్లపై ఉక్కుపాదం: దేశంలో అశాంతిని రేపేందుకు పాకిస్థాన్ కేంద్రంగా సోషల్ మీడియాలో నిమిషాల వ్యవధిలో విష ప్రచారం సాగుతోందని బండి సంజయ్ వెల్లడించారు.
-
దేశ భద్రతను దృష్టిలో ఉంచుకుని కేంద్ర ప్రభుత్వం తక్షణమే స్పందించిందని ఆయన తెలిపారు.
-
భారత్లో అసత్య ప్రచారాలు వ్యాప్తి చేస్తున్న పాకిస్థాన్కు చెందిన ఏకంగా 480 సోషల్ మీడియా అకౌంట్లను కేంద్ర ప్రభుత్వం తక్షణమే బ్లాక్ చేసిందని బండి సంజయ్ వివరించారు.
