లక్షలాది మంది అగ్రిగోల్డ్ బాధితులకు త్వరలోనే పూర్తిస్థాయిలో న్యాయం చేస్తామని ఆంధ్రప్రదేశ్ పౌరసరఫరాల శాఖ మంత్రి నాదెండ్ల మనోహర్ స్పష్టం చేశారు. ముఖ్యమంత్రి చంద్రబాబు నాయుడి ఆదేశాల మేరకు కూటమి ప్రభుత్వం ఈ సమస్య పరిష్కారంపై ప్రత్యేక దృష్టి సారించి ఇప్పటికే మూడుసార్లు ఉన్నతస్థాయి సమీక్షలు నిర్వహించినట్లు వెల్లడించారు. సంస్థకు సంబంధించి రాష్ట్రవ్యాప్తంగా ఉన్న 20,000 ఎకరాల భూముల్లో, మొదటి విడతగా వెంటనే వేలం వేయడానికి సిద్ధంగా ఉన్న 6,000 ఎకరాలకు పైగా ఆస్తుల అమ్మకపు ప్రక్రియను శరవేగంగా ప్రారంభించాలని సీఐడీ అధికారులను ఆదేశించారు.
అగ్రిగోల్డ్ సంస్థ 5 లక్షల మంది ఏజెంట్ల ద్వారా 9 రాష్ట్రాల్లోని డిపాజిటర్ల నుంచి సుమారు రూ. 6,000 కోట్లను సేకరించగా, అందులో ఒక్క ఆంధ్రప్రదేశ్ నుంచే రూ. 3,000 కోట్ల వరకు ఉన్నాయని మంత్రి తెలిపారు. ప్లాట్లు ఇస్తామని నమ్మించి చేసిన ఈ మోసానికి సంబంధించిన కేసుల విచారణకు, ముఖ్యమంత్రి ఆదేశాల మేరకు ఆగస్టు 15 నాటికి ప్రత్యేక కోర్టును ఏర్పాటు చేయనున్నట్లు ప్రకటించారు. అలాగే బాధితులకు కేసు పురోగతి, వేలం వివరాలు పారదర్శకంగా తెలిసేలా త్వరలోనే ఒక ప్రత్యేక వెబ్సైట్ను కూడా అందుబాటులోకి తేనున్నట్లు పేర్కొన్నారు. డిపాజిటర్ల నుంచి బాండ్ల సేకరణను వేగవంతం చేసేందుకు పోలీసుల భాగస్వామ్యంతో 9 రాష్ట్రాల్లో ప్రత్యేక సెల్స్ను ఏర్పాటు చేస్తున్నామని, సెప్టెంబర్ 15 నాటికి ఈ ప్రక్రియను పూర్తి చేయాలని స్పష్టమైన లక్ష్యాన్ని నిర్దేశించినట్లు వివరించారు. ఆగస్టు 11న ప్రభుత్వ ప్రధాన కార్యదర్శితో మరోసారి సమావేశమై వేలం నిబంధనలు, విధివిధానాలను ఆమోదిస్తామని హామీ ఇచ్చారు. దశలవారీగా నిర్ణయాలు తీసుకుంటూ, నిరుపేద బాధితులకు వారు నష్టపోయిన మొత్తాన్ని తిరిగి చెల్లించేలా పటిష్టమైన చర్యలు తీసుకుంటున్నామని ఆయన పునరుద్ఘాటించారు.
