అనారోగ్యంతో బాధపడుతున్న పేద, బడుగు, బలహీనవర్గాల ప్రజలకు ముఖ్యమంత్రి సహాయనిధి (CMRF) అండగా నిలుస్తోందని కళ్యాణదుర్గం ఎమ్మెల్యే అమిలినేని సురేంద్రబాబు అన్నారు. స్థానిక ప్రజావేదికలో నిర్వహించిన కార్యక్రమంలో 53 మంది బాధితులకు మొత్తం ₹33,16,801 విలువైన ముఖ్యమంత్రి సహాయనిధి చెక్కులను ఆయన పంపిణీ చేశారు. ఈ సందర్భంగా వింత వ్యాధులతో బాధపడుతున్న చిన్నారులు యస్విత శ్రీ, జైశ్విక శ్రీ వైద్య ఖర్చుల కోసం ఎమ్మెల్యే వ్యక్తిగతంగా ₹50 వేల ఆర్థిక సాయం అందించడంతో పాటు, విజయవాడ ఎయిమ్స్ అధికారులతో మాట్లాడి మెరుగైన చికిత్స అందేలా చూస్తామని హామీ ఇచ్చారు.
ఈ సందర్భంగా ఎమ్మెల్యే సురేంద్రబాబు మాట్లాడుతూ, రాష్ట్రంలో డీఎస్సీ నియామక ప్రక్రియను ప్రభుత్వం అత్యంత పారదర్శకంగా నిర్వహించిందని తెలిపారు. ఎలాంటి వివాదాలు లేకుండా ఒకేసారి 16,500 ఉపాధ్యాయ పోస్టులను భర్తీ చేస్తుంటే, ప్రతిపక్షాలు అభ్యర్థులను అవమానించేలా అసత్య ఆరోపణలు చేయడం సరికాదని మండిపడ్డారు. గత వైసీపీ ప్రభుత్వ పాలనలో ఉపాధ్యాయులను మద్యం షాపుల వద్ద విధులు నిర్వహించే పరిస్థితికి తీసుకెళ్లారని, తాడేపల్లి కేంద్రంగా మద్యం నిధులు దుర్వినియోగం అయ్యాయని విమర్శించారు. 2019-2024 మధ్య కళ్యాణదుర్గం తాగు, సాగునీటి సమస్యలను గత పాలకులు పట్టించుకోలేదని ఆరోపించారు.
జర్నలిస్టుల సంక్షేమానికి తమ ప్రభుత్వం కట్టుబడి ఉందని, కళ్యాణదుర్గంలో ప్రెస్ క్లబ్ నిర్మాణానికి స్థలం కేటాయించి భవనాన్ని కూడా నిర్మిస్తామని ఎమ్మెల్యే హామీ ఇచ్చారు. ప్రస్తుత ప్రభుత్వం పత్రికా స్వేచ్ఛకు మరియు ప్రజా స్వేచ్ఛకు పూర్తి ప్రాధాన్యత ఇస్తుందని పేర్కొన్నారు. ఈ కార్యక్రమంలో మార్కెట్ కమిటీ నాయకులు, వివిధ మండలాల టీడీపీ కన్వీనర్లు, స్థానిక నాయకులు మరియు లబ్ధిదారులు పెద్ద సంఖ్యలో పాల్గొన్నారు.
