దేశంలో ఎల్పీజీ రవాణా మౌలిక సదుపాయాలను మరింత బలోపేతం చేసేందుకు కేంద్ర ప్రభుత్వం కీలక ముందడుగు వేసింది. ఆరు రాష్ట్రాల్లో దాదాపు 1,800 కిలోమీటర్ల పొడవైన ఎల్పీజీ పైప్లైన్ నెట్వర్క్ అభివృద్ధికి పెట్రోలియం, సహజ వాయువు నియంత్రణ మండలి (PNGRB) ఆమోదం తెలిపింది. ఈ ప్రాజెక్టుల కోసం సుమారు రూ.7,000 కోట్ల పెట్టుబడి అవసరమవుతుందని అంచనా వేస్తున్నారు.
తెలంగాణ, మహారాష్ట్ర, ఉత్తరప్రదేశ్, ఉత్తరాఖండ్, కర్ణాటక, గోవా రాష్ట్రాల్లో కొత్త ఎల్పీజీ పైప్లైన్ ప్రాజెక్టులను చేపట్టనున్నారు. పైప్లైన్ నెట్వర్క్ విస్తరణ ద్వారా ఎల్పీజీని భారీ స్థాయిలో, వేగంగా, మరింత సమర్థవంతంగా రవాణా చేయడానికి అవకాశం ఏర్పడనుంది. దీంతో రవాణా వ్యవస్థపై ఆధారపడే ఇతర మార్గాలపై ఒత్తిడి తగ్గే అవకాశం ఉంది.
దేశవ్యాప్తంగా ఎల్పీజీ సరఫరా వ్యవస్థను మరింత బలోపేతం చేయడం ఈ ప్రాజెక్టుల ప్రధాన లక్ష్యంగా ఉంది. పెరుగుతున్న ఇంధన అవసరాలకు అనుగుణంగా సరఫరా గొలుసును సమర్థవంతంగా నిర్వహించడంతో పాటు, దీర్ఘకాలిక ఇంధన భద్రతను మెరుగుపరచడంలో ఈ పైప్లైన్ నెట్వర్క్ కీలక పాత్ర పోషించనుంది. ఆరు రాష్ట్రాల్లో మౌలిక సదుపాయాల అభివృద్ధితో ప్రాంతీయంగా ఎల్పీజీ లభ్యత, రవాణా సామర్థ్యం మరింత పెరిగే అవకాశం ఉంది.
