భద్రాద్రి కొత్తగూడెం జిల్లాలో అంగన్వాడీ టీచర్లు, సహాయకుల పోస్టుల భర్తీకి చేపట్టిన ఎంపిక ప్రక్రియను పూర్తిగా పారదర్శకంగా, ప్రభుత్వ నిబంధనలకు అనుగుణంగా నిర్వహించనున్నట్లు జిల్లా సంక్షేమాధికారి స్వర్ణలత లెనినా తెలిపారు. అభ్యర్థుల ఎంపికలో ఎలాంటి అవకతవకలకు తావు లేకుండా నిబంధనల ప్రకారం ప్రక్రియ కొనసాగుతుందని ఆమె స్పష్టం చేశారు.
అంగన్వాడీ టీచర్లు, సహాయకుల పోస్టులకు దరఖాస్తు చేసుకున్న అభ్యర్థులు దళారులను నమ్మి మోసపోవద్దని స్వర్ణలత లెనినా సూచించారు. ఉద్యోగాలు ఇప్పిస్తామని, ఉన్నతాధికారులతో తమకు పరిచయాలు ఉన్నాయని చెప్పే వ్యక్తుల మాటలను నమ్మవద్దని హెచ్చరించారు. ఉద్యోగం కోసం ఎవరైనా డబ్బులు డిమాండ్ చేస్తే అప్రమత్తంగా ఉండాలని సూచించారు.
ఉద్యోగాల భర్తీ ప్రక్రియలో ప్రభుత్వ మార్గదర్శకాలను మాత్రమే అనుసరించాలని అధికారులు స్పష్టం చేశారు. అభ్యర్థులు తమకు సంబంధించిన సమాచారం, ఎంపిక ప్రక్రియ వివరాలను అధికారిక మార్గాల ద్వారా మాత్రమే తెలుసుకోవాలని సూచించారు. ఉద్యోగాల పేరుతో డబ్బులు వసూలు చేసే వ్యక్తుల పట్ల జాగ్రత్తగా ఉండాలని, ఎలాంటి అనుమానాస్పద పరిణామాలు ఎదురైనా సంబంధిత అధికారులకు సమాచారం అందించాలని కోరారు.
