ఆంధ్రప్రదేశ్ రాష్ట్రంలో త్వరలో జరగనున్న స్థానిక సంస్థల ఎన్నికల సమరానికి కూటమి శ్రేణులు సమాయత్తమవుతున్నాయి. ఈ నేపథ్యంలో ముఖ్యమంత్రి నారా చంద్రబాబు నాయుడుతో జనసేన పార్టీ అగ్రనేతలు నిర్వహించిన అత్యున్నత స్థాయి సమావేశం రాజకీయ వర్గాల్లో విశేష ప్రాధాన్యత సంతరించుకుంది. అమరావతి పరిధిలోని ఉండవల్లి ముఖ్యమంత్రి క్యాంపు కార్యాలయంలో జరిగిన ఈ కీలక భేటీలో.. రాబోయే స్థానిక సంస్థల ఎన్నికల్లో కూటమి విజయమే లక్ష్యంగా ఇరు పార్టీల నేతలు సుదీర్ఘంగా చర్చలు జరిపారు.
ఈ సమావేశంలో జనసేన తరఫున పౌరసరఫరాల శాఖ మంత్రి నాదెండ్ల మనోహర్, లింగమనేని రమేష్, హరిప్రసాద్ పాల్గొనగా.. తెలుగుదేశం పార్టీ వైపు నుంచి ఏపీ టీడీపీ రాష్ట్ర అధ్యక్షుడు పల్లా శ్రీనివాసరావు, జలవనరుల శాఖ మంత్రి నిమ్మల రామానాయుడు హాజరై పలు అంశాలపై తమ అభిప్రాయాలను పంచుకున్నారు. పొత్తులో భాగంగా కార్పొరేషన్లు, మున్సిపాలిటీలు, జడ్పీటీసీ, ఎంపీటీసీ స్థానాల పంపిణీకి సంబంధించిన ప్రాథమిక కసరత్తును నేతలు సమీక్షించారు. పార్టీల మధ్య ఎక్కడా విభేదాలు, సమన్వయ లోపం తలెత్తకుండా క్షేత్రస్థాయిలో సీట్ల పంపిణీ పూర్తి చేయడమే ప్రధాన ఎజెండాగా ఈ చర్చలు సాగాయి.
సార్వత్రిక ఎన్నికల మాదిరిగానే స్థానిక ఎన్నికల్లోనూ కూటమి బలాన్ని చాటాలని, గ్రామీణ, పట్టణ ప్రాంతాల్లో మెజారిటీ స్థానాలను కైవసం చేసుకునేందుకు ఉమ్మడి వ్యూహాలతో ముందుకు సాగాలని నేతలు నిర్ణయించారు. గ్రామ, వార్డు స్థాయిల్లో టీడీపీ, జనసేన, బీజేపీ కార్యకర్తలు సమన్వయంతో పనిచేసేలా పకడ్బందీ కార్యాచరణను రూపొందిస్తున్నారు. ఏకాభిప్రాయంతో అభ్యర్థుల ఎంపికను కొలిక్కి తెచ్చి, ప్రచార రంగంలోకి దూసుకెళ్లేందుకు ఇరు పార్టీల అధిష్ఠానాలు తుది కసరత్తును వేగవంతం చేశాయి.
