కేసులో చేరిన కొత్త సెక్షన్: పోక్సో (POCSO) చట్టం కింద ఆరోపణలు ఎదుర్కొంటూ ప్రస్తుతం చర్లపల్లి జైలులో రిమాండ్ ఖైదీగా ఉన్న బండి సాయి భగీరథ్ కేసులో పోలీసులు దర్యాప్తును మరింత ముమ్మరం చేశారు. బాధితురాలి నుంచి సేకరించిన సాంకేతిక ఆధారాల ప్రకారం నిందితుడిపై భారతీయ న్యాయ సంహిత (BNS) లోని 64(2)(m) సెక్షన్ను అదనంగా చేర్చారు. ఒకే బాధితురాలిపై పలుమార్లు అత్యాచారానికి పాల్పడినట్లు అభియోగాలు ఉన్నప్పుడు ఈ సెక్షన్ను నమోదు చేస్తారని, ఈ కొత్త సెక్షన్ ప్రకారం నేరం రుజువైతే భగీరథ్కు కనీసం 10 ఏళ్ల వరకు జైలుశిక్ష పడే అవకాశం ఉందని న్యాయ నిపుణులు పేర్కొంటున్నారు.
చర్లపల్లి జైలులో ములాఖత్: ఈ కేసులో రోజుకో కొత్త ట్విస్ట్ వెలుగులోకి వస్తుండటంతో చట్టపరమైన ఇబ్బందులు మరింత పెరిగే అవకాశం ఉంది. ఈ నేపథ్యంలోనే చర్లపల్లి జైలులో ఉన్న భగీరథ్ను కలిసేందుకు ఆయన కుటుంబ సభ్యులు సిద్ధమయ్యారు. జైలు నిబంధనల ప్రకారం ములాఖత్ ద్వారా వారు నిందితుడిని కలవనున్నారు. కఠినమైన సెక్షన్లు అదనంగా తోడవడంతో తదుపరి లీగల్ ప్రాసెస్, కోర్టులో దాఖలు చేయాల్సిన బెయిల్ పిటిషన్లపై ఈ సమావేశంలో కుటుంబ సభ్యులు తమ న్యాయవాదులతో కలిసి చర్చించే అవకాశం ఉంది.
14 మంది సోషల్ మీడియా ఇన్ఫ్లూయెన్సర్లపై కేసులు: మరోవైపు సోషల్ మీడియా వేదికగా నిందితుడికి మద్దతుగా ప్రచారం నిర్వహిస్తూ, అతడు నిర్దోషి అని చిత్రీకరించే ప్రయత్నం చేసిన 14 మంది సోషల్ మీడియా ఇన్ఫ్లూయెన్సర్లపై పోలీసులు ఎఫ్ఐఆర్ నమోదు చేశారు. వీరంతా భారీగా డబ్బులు తీసుకుని పెయిడ్ ప్రమోషన్లు చేశారని, ఆ క్రమంలో పోక్సో చట్ట నిబంధనలను ఉల్లంఘించి మైనర్ బాలిక వివరాలను, గుర్తింపును బయటపెట్టారని ప్రాథమిక విచారణలో తేలింది. ఈ వ్యవహారంలో మొత్తం 27 మందిపై ఫిర్యాదులు రాగా, మిగిలిన వారిపై కూడా దర్యాప్తు కొనసాగుతోందని అధికారులు వెల్లడించారు.
