సుప్రీంకోర్టు సంచలన తీర్పు: భవనాల్లో అమర్చే లిఫ్ట్లు ప్రమాదానికి గురైతే దాని బాధ్యత నుంచి ఎవరూ తప్పించుకోలేరని భారత అత్యున్నత న్యాయస్థానం (సుప్రీంకోర్టు) సంచలన తీర్పు వెలువరించింది. లిఫ్ట్ ప్రమాదం జరిగినప్పుడు కేవలం ఒకరిపైనే నెపం నెట్టడానికి వీల్లేదని.. ఎలివేటర్ తయారీ సంస్థ, దాని నిర్వహణ చూసే సర్వీసింగ్ ఏజెన్సీ, మరియు సదరు భవన యాజమాన్యం (ముగ్గురూ) సంయుక్తంగా బాధ్యత వహించాల్సిందేనని జస్టిస్ పి.ఎస్. నరసింహ, జస్టిస్ ఆలోక్ అరధేలతో కూడిన ధర్మాసనం స్పష్టం చేసింది. లిఫ్ట్ అనేది ఒక సాధారణ ప్రజా రవాణా సాధనమని, అందులోకి అడుగుపెట్టే పౌరుల ప్రాణాలకు, భద్రతకు ఈ మూడు వర్గాలదే ప్రాథమిక జవాబుదారీతనమని కోర్టు వ్యాఖ్యానించింది.
2003 నాటి ‘రా’ అధికారి మృతి కేసు: ఈ చారిత్రాత్మక తీర్పు 2003 మార్చి 20న దేశ రాజధానిలోని ‘రా’ (RAW) ప్రధాన కార్యాలయ భవనంలో జరిగిన ఒక ఘోర ప్రమాద విచారణ నేపథ్యంలో వెలువడింది. ఆ సమయంలో 6, 7 అంతస్తుల మధ్య లిఫ్ట్ నిలిచిపోగా, అందులో చిక్కుకున్న మాజీ డిప్లొమాట్ విపిన్ హండాను బయటకు తీసే క్రమంలో లిఫ్ట్ ఒక్కసారిగా కిందకు జారిపోయింది. ఈ ప్రమాదంలో ఆయన తల ఇరుక్కుని అక్కడికక్కడే ప్రాణాలు కోల్పోయారు. ఈ ఘటనపై సుదీర్ఘ విచారణ జరిపిన జాతీయ వినియోగదారుల వివాదాల పరిష్కార కమిషన్ (ఎన్సీడీఆర్సీ).. సదరు లిఫ్ట్లో చాలా కాలంగా సాంకేతిక లోపాలు ఉన్నా ఓటిస్ కంపెనీ పట్టించుకోలేదని, ప్రభుత్వ పర్యవేక్షక శాఖలు కూడా విఫలమయ్యాయని తేల్చింది. దానికి వ్యతిరేకంగా ఓటిస్ కంపెనీ సుప్రీంకోర్టును ఆశ్రయించగా, అత్యున్నత న్యాయస్థానం వారి అప్పీల్ను కొట్టివేసింది.
భారీ నష్టపరిహారం ఖరారు: బాధిత విపిన్ హండా కుటుంబానికి (భార్య, ఇద్దరు పిల్లలకు) ప్రమాదం జరిగిన నాటి నుంచి 9 శాతం వార్షిక వడ్డీతో కలిపి రూ. 3.01 కోట్ల భారీ నష్టపరిహారాన్ని చెల్లించాలంటూ గతంలో ఇచ్చిన ఉత్తర్వులను సుప్రీంకోర్టు సమర్థించింది. ఈ మొత్తం పరిహారంలో లిఫ్ట్ తయారీ సంస్థ అయిన ‘ఓటిస్ కంపెనీ’ 70 శాతం, మిలిటరీ ఇంజినీరింగ్ సర్వీసెస్ (MES) 25 శాతం, మరియు సదరు ప్రభుత్వ శాఖ 5 శాతం చొప్పున భరించాలని న్యాయస్థానం వాటాలను ఖరారు చేసింది. నగరాల్లో స్థల కొరత వల్ల బహుళ అంతస్తుల భవనాలు, లిఫ్టుల వినియోగం నిత్యజీవితంలో భాగమయ్యాయని పేర్కొన్న కోర్టు.. ప్రమాదం జరిగినప్పుడు బాధితులు ఎవరి తప్పిదం ఎంత ఉందో వెతుక్కుంటూ తిరగలేరని, బాధ్యులైన ఎవరి నుంచైనా పూర్తి పరిహారం పొందే హక్కు వారికి ఉంటుందని తేల్చిచెప్పింది.
