క్యాన్సర్ వంటి ప్రాణాంతక వ్యాధులతో పోరాడుతున్న బాధితులను లక్ష్యంగా చేసుకుని సాగుతున్న భారీ అక్రమ దందాను ఢిల్లీ పోలీసుల క్రైమ్ బ్రాంచ్ వెలుగులోకి తీసుకొచ్చింది. క్యాన్సర్ చికిత్సలో ఉపయోగించే ‘ఎవాల్యుమాబ్’ (Avelumab) పేరుతో విక్రయించిన ఇంజెక్షన్లను బాధితులు ఒక్కోదానికి రూ.1 లక్ష వరకు చెల్లించి కొనుగోలు చేసినట్లు దర్యాప్తులో వెల్లడైంది.
ఈ ఇంజెక్షన్లను జర్మనీకి చెందిన మెర్క్ ల్యాబ్‌లో పరీక్షించగా అందులో అసలు క్యాన్సర్ నిరోధక ఔషధ పదార్థం లేదని, కేవలం నీళ్లు మాత్రమే ఉన్నట్లు తేలింది. దీంతో ప్రాణాలను కాపాడుకోవాలనే ఆశతో ఖరీదైన మందులు కొనుగోలు చేసిన బాధితులు మోసపోయిన విషయం వెలుగులోకి వచ్చింది. ఈ వ్యవహారంపై పోలీసులు అక్రమ నెట్‌వర్క్‌కు సంబంధించిన వివరాలను సేకరిస్తున్నారు.
మరోవైపు రాజస్థాన్ ప్రభుత్వ పథకం కింద క్యాన్సర్ రోగులకు ఉచితంగా అందించే మందులను కూడా ఈ ముఠా అక్రమంగా మార్కెట్లోకి తరలించి విక్రయించినట్లు దర్యాప్తులో వెల్లడైంది. కోట్లాది రూపాయల విలువైన ఈ దందా వెనుక ఉన్న వ్యక్తులు, నెట్‌వర్క్‌పై పోలీసులు దర్యాప్తు ముమ్మరం చేశారు. ప్రాణాంతక వ్యాధుల చికిత్స కోసం ఉపయోగించే మందుల్లోనే నకిలీలకు పాల్పడటం తీవ్ర ఆందోళన కలిగిస్తోంది.
