మలయాళ నటి మమితా బైజు ఆస్పత్రిలో చేరినట్లు సమాచారం. ప్రస్తుతం వైద్యుల సూచనల మేరకు ఆమె విశ్రాంతి తీసుకుంటున్నట్లు సన్నిహిత వర్గాలు వెల్లడించాయి. అనారోగ్యం కారణంగా ఆమె ఆస్ట్రేలియా పర్యటనను రద్దు చేసుకోవడంతో పాటు, మెల్‌బోర్న్‌లో జరగాల్సిన ఓనం వేడుకలను కూడా వాయిదా వేసినట్లు తెలుస్తోంది. మమితా బైజు Mamitha Baiju మెల్‌బోర్న్‌లో నిర్వహించనున్న Clyde Onam 2026 వేడుకలకు ముఖ్య అతిథిగా హాజరుకావాల్సి ఉంది.
ఈ కార్యక్రమం కోసం మమితా ఆస్ట్రేలియా వెళ్లాల్సి ఉండగా.. ప్రస్తుతం ఆస్పత్రిలో చికిత్స పొందుతున్న నేపథ్యంలో ఆ పర్యటనను రద్దు చేసుకున్నట్లు సమాచారం. దీంతో ఆమె పాల్గొనాల్సిన ఓనం వేడుకను నిర్వాహకులు వాయిదా వేసినట్లు తెలుస్తోంది. అయితే మమితాకు ఎదురైన అనారోగ్య సమస్య ఏమిటనే దానిపై ఇప్పటివరకు ఎలాంటి అధికారిక వివరాలు వెల్లడికాలేదు. అలాగే ఆమె ఆస్పత్రిలో ఎంతకాలం ఉండాల్సి వస్తుందనే విషయం కూడా స్పష్టత లేదు.
ఇటీవలే ‘విశ్వనాథ్ అండ్ సన్స్’ సినిమాతో ప్రేక్షకుల ముందుకు వచ్చిన మమితా బైజు మంచి విజయాన్ని అందుకున్నారు. ఆమె ఆస్పత్రిలో చేరిన విషయం తెలియడంతో అభిమానులు ఆందోళన వ్యక్తం చేస్తున్నారు. అయితే ప్రస్తుతం ఆమె వైద్యుల సూచనలను పాటిస్తూ విశ్రాంతి తీసుకుంటున్నట్లు మాత్రమే తెలుస్తోంది. మమితా త్వరగా కోలుకోవాలని అభిమానులు, సినీ ప్రముఖులు ఆకాంక్షిస్తున్నారు. ఆమె ఆరోగ్యం మెరుగుపడిన తర్వాత వాయిదా పడిన ఓనం వేడుకకు కొత్త తేదీని నిర్వాహకులు ప్రకటించే అవకాశం ఉంది.
