మహబూబ్నగర్ జిల్లా జడ్చర్ల నియోజకవర్గంలో ఎక్సైజ్ పోలీసులు భారీ వ్యూహంతో అంతరాష్ట్ర గంజాయి విక్రయాల ముఠా గుట్టురట్టు చేశారు. బీహార్ నుంచి గంజాయిని అక్రమంగా తరలించి, ఇక్కడ చిన్న చిన్న ప్యాకెట్లుగా మార్చి విక్రయిస్తున్న ఒక నిందితుడిని అధికారులు పట్టుకున్నారు. బాలానగర్ మండల కేంద్రంలోని తహసీల్దార్ కార్యాలయం సమీపంలో బహిరంగంగా గంజాయి దందా సాగుతోందన్న పక్కా సమాచారంతో ఎక్సైజ్ సీఐ విప్లవరెడ్డి ఆధ్వర్యంలో ఎస్సైలు కార్తీక్ రెడ్డి, నాగరాజు తమ సిబ్బందితో కలిసి ఆకస్మిక దాడులు నిర్వహించారు. ఈ తనిఖీల్లో అనుమానాస్పదంగా తిరుగుతున్న వ్యక్తిని అదుపులోకి తీసుకోగా అసలు విషయం వెలుగుచూసింది.
పోలీసుల సమగ్ర విచారణలో నిందితుడు బీహార్ రాష్ట్ర రాజధాని పాట్నాకు చెందిన ఉపేందర్గా గుర్తింపు లభించింది. అతని వద్ద నుంచి ఎక్సైజ్ అధికారులు 3.150 కేజీల గంజాయిని, ఒక మొబైల్ ఫోన్ను, రవాణాకు ఉపయోగించిన హోండీ వాహనాన్ని స్వాధీనం చేసుకుని సీజ్ చేశారు. నిందితుడు ఉపేందర్ను మరింత లోతుగా ప్రశ్నించగా.. తాను బీహార్ నుండి తక్కువ ధరకు గంజాయిని సేకరించి ఇక్కడికి తీసుకువస్తున్నట్లు అంగీకరించాడు. ఆపై స్థానిక కూలీలు, యువతను లక్ష్యంగా చేసుకుని 3 నుండి 4 గ్రాముల చిన్న చిన్న ప్యాకెట్లుగా ప్యాక్ చేసి, ఒక్కో ప్యాకెట్ను రూ. 400 చొప్పున విక్రయిస్తూ భారీగా అక్రమ సొమ్ము గడిస్తున్నట్లు అధికారులు వెల్లడించారు.
జిల్లాలో గంజాయి మహమ్మారిని పూర్తిగా నిర్మూలించేందుకు ప్రజలందరూ సహకరించాలని మహబూబ్నగర్ అసిస్టెంట్ ఎక్సైజ్ సూపరింటెండెంట్ నరసింహారెడ్డి కోరారు. ఎక్కడైనా గంజాయి అమ్మకాలు, కొనుగోళ్లు లేదా అక్రమ రవాణా జరుగుతున్నట్లు గమనిస్తే వెంటనే ఎక్సైజ్ శాఖ అధికారిక నంబర్లు అయిన 9030019943, 8712658866 లకు ఫోన్ చేసి సమాచారం అందించాలని విజ్ఞప్తి చేశారు. సమాచారం ఇచ్చిన వారి వివరాలను పూర్తిగా గోప్యంగా ఉంచుతామని ఆయన భరోసా ఇచ్చారు. ఈ సందర్భంగా ప్రాణాలకు తెగించి అంతరాష్ట్ర నిందితుడిని పట్టుకున్న ఎక్సైజ్ సిబ్బందిని, అధికారుల బృందాన్ని ఆయన ప్రత్యేకంగా అభినందించారు.
