కోర్టు విచారణలకు సంబంధించిన అనధికారిక రికార్డింగులను యూట్యూబ్లో అప్లోడ్ కాకుండా ముందస్తుగా పర్యవేక్షించడం లేదా వాటిని తొలగించడం సాధ్యం కాదని టెక్ దిగ్గజం గూగుల్ ఢిల్లీ హైకోర్టుకు స్పష్టం చేసింది. ఇది చట్టపరంగా తప్పనిసరి కాదని, సాంకేతికంగానూ అసాధ్యమని పేర్కొంటూ ఈ మేరకు కోర్టులో అఫిడవిట్ దాఖలు చేసింది.
ఎక్సైజ్ పాలసీ కేసులో అరవింద్ కేజ్రీవాల్ కోర్టు విచారణకు హాజరైన దృశ్యాలు సామాజిక మాధ్యమాల్లో వైరల్గా మారాయి. దీనిపై న్యాయవాది వైభవ్ సింగ్ హైకోర్టులో పిటిషన్ దాఖలు చేస్తూ, కోర్టు విచారణలకు సంబంధించిన అనధికారిక రికార్డింగులను అరికట్టేలా సోషల్ మీడియా వేదికలను ఆదేశించాలని కోరారు. ఈ పిటిషన్పై స్పందిస్తూ గూగుల్ తన వాదనలను వినిపించింది.
పిటిషనర్ గుర్తించిన నిర్దిష్ట వీడియోలను ఇప్పటికే తొలగించామని, భారత్లో బ్లాక్ చేశామని గూగుల్ వెల్లడించింది. అయితే, తమ ప్లాట్ఫామ్లో ప్రతిరోజూ అప్లోడ్ అయ్యే లక్షలాది వీడియోలను పరిశీలించి, వాటిలో కోర్టు విచారణలకు సంబంధించిన వాటిని గుర్తించడం సాధ్యం కాదని పేర్కొంది. ఏదైనా కంటెంట్ చట్టబద్ధతను న్యాయస్థానాలే నిర్ధారించాలని, కేవలం ఓ మాధ్యమంగా ఉన్న తాము ఆ నిర్ణయం తీసుకోలేమని స్పష్టం చేసింది. నిర్దిష్ట యూఆర్ఎల్లతో కోర్టు ఆదేశాలు జారీ చేస్తే తప్ప, కంటెంట్ను తొలగించలేమని గూగుల్ తన అఫిడవిట్లో వివరించింది.
న్యాయవ్యవస్థ ప్రయోజనాల దృష్ట్యా అనధికారిక రికార్డింగ్ల అంశంపై సమర్థవంతమైన నియంత్రణ అవసరమని గతంలో హైకోర్టు అభిప్రాయపడిన విషయం తెలిసిందే. తాజా పరిణామం న్యాయవ్యవస్థ పవిత్రతను కాపాడటంలో ఎదురవుతున్న సవాళ్లను, టెక్ ప్లాట్ఫామ్లు ఎదుర్కొంటున్న ఆచరణాత్మక ఇబ్బందులను స్పష్టం చేస్తోం,ది.
