అక్కినేని యువ హీరో అఖిల్ నటించిన సరికొత్త యాక్షన్ డ్రామా ‘లెనిన్’ చిత్రం ఈరోజు ప్రపంచవ్యాప్తంగా గ్రాండ్గా విడుదలైంది. ఈ సినిమాకు మొదటి ఆట నుంచే ప్రేక్షకుల నుండి ఎంతో అద్భుతమైన రెస్పాన్స్, పాజిటివ్ టాక్ లభిస్తోంది. ఈ నేపథ్యంలో థియేటర్ల వద్ద సినిమాకు వస్తున్న ప్రజాదరణను, మాస్ స్పందనను స్వయంగా చూసి ఆస్వాదించడానికి అఖిల్ అర్ధాంగి జైనబ్ రవ్జీ హైదరాబాద్లోని ఒక ప్రముఖ థియేటర్ను సందర్శించి సందడి చేశారు.
నగరంలో మాస్ చిత్రాలకు కేరాఫ్ అడ్రస్గా నిలిచే శ్రీరాములు థియేటర్కు జైనబ్ రవ్జీ విచ్చేసి, అక్కడ సాధారణ అభిమానులతో కలిసి సినిమాను వీక్షించారు. థియేటర్కు చేరుకున్న ఆమెకు అఖిల్ అభిమానులు ఘనంగా మరియు ఉత్సాహంగా స్వాగతం పలికారు. థియేటర్ ప్రాంగణంలో తన స్నేహితులతో కలిసి ఎంతో సరదాగా ముచ్చటిస్తూ జైనబ్ కనిపించారు. సినిమా ముగిసిన అనంతరం ‘లెనిన్’ చిత్రానికి లభిస్తున్న ప్రజాదరణ, అఖిల్ పవర్ఫుల్ నటనకు వస్తున్న ప్రశంసలపై ఆమె ఎంతో సంతోషాన్ని వ్యక్తం చేశారు.
‘వినరో భాగ్యము విష్ణుకథ’ ఫేమ్ మురళి కిషోర్ అబ్బూరు దర్శకత్వంలో తెరకెక్కిన ఈ చిత్రాన్ని అన్నపూర్ణ స్టూడియోస్ సమర్పణలో మనం ఎంటర్ప్రైజెస్, సితార ఎంటర్టైన్మెంట్స్ బ్యానర్లపై అక్కినేని నాగార్జున, సూర్యదేవర నాగవంశీ సంయుక్తంగా నిర్మించారు. అఖిల్ సరసన భాగ్యశ్రీ బోర్సే ‘భారతి’ పాత్రలో హీరోయిన్గా నటించగా.. శివాజీ, బ్రహ్మాజీ, సునీల్, ఈశ్వరి రావు కీలక పాత్రలు పోషించారు. ఎస్. థమన్ సంగీతం అందించిన ఈ సినిమాకు టాలీవుడ్ స్టార్ హీరో జూనియర్ ఎన్టీఆర్ తన పవర్ఫుల్ వాయిస్ ఓవర్ అందించడం చిత్రానికే ప్రత్యేక ఆకర్షణగా నిలిచింది.
