కోలీవుడ్ స్టార్ హీరో దళపతి విజయ్ నటిస్తున్న అత్యంత ప్రతిష్టాత్మక చివరి చిత్రం ‘జన నాయగన్’ విడుదలకు సిద్ధమవుతోంది. జులై 23న ప్రపంచవ్యాప్తంగా థియేటర్లలోకి రానున్న ఈ సినిమాపై చాలా కాలంగా ఒక ఆసక్తికరమైన ప్రచారం సాగుతోంది. నందమూరి బాలకృష్ణ నటించిన తెలుగు బ్లాక్బస్టర్ హిట్ ‘భగవంత్ కేసరి’ చిత్రానికి ఇది తమిళ రీమేక్ అంటూ సాగుతున్న వార్తలపై ఇప్పటివరకు చిత్రబృందం మౌనంగానే ఉంది. అయితే తాజాగా ఈ చిత్ర దర్శకుడు హెచ్. వినోద్ తొలిసారిగా స్పందిస్తూ ఈ ప్రచారానికి తెరదించారు. ఈ సినిమా పూర్తిస్థాయి రీమేక్ కాదని, కేవలం 50 శాతం మాత్రమే ‘భగవంత్ కేసరి’ కథాంశం ఆధారంగా దీనిని రూపొందించామని ఆయన స్పష్టం చేశారు.
ఒక ప్రత్యేక ఇంటర్వ్యూలో దర్శకుడు హెచ్. వినోద్ మాట్లాడుతూ.. ఈ చిత్ర మొదటి భాగంలో సుమారు 60 శాతం, రెండో భాగంలో కేవలం 20 శాతం మాత్రమే ఒరిజినల్ కథతో పోలికలు ఉంటాయని వెల్లడించారు. మిగతా భాగమంతా తమిళ ప్రేక్షకుల అభిరుచులకు అనుగుణంగా, విజయ్ మాస్ ఇమేజ్ను దృష్టిలో ఉంచుకుని సరికొత్తగా తీర్చిదిద్దినట్లు వివరించారు. నిజానికి ‘భగవంత్ కేసరి’ కథను తమిళంలో చేయాలనే ఆలోచన విజయ్దేనని, సమాజంలో మహిళా సాధికారత, వారి రక్షణ అనే ఒక మంచి సందేశం ఉన్న కథ కావడం వల్లే ఆయన ఈ ప్రాజెక్ట్ను ఎంచుకున్నారని దర్శకుడు పేర్కొన్నారు.
ఈ సినిమాకు సంబంధించి మరో సంచలన నిజాన్ని కూడా వినోద్ ఈ సందర్భంగా బయటపెట్టారు. సినిమా పోస్ట్ క్లైమాక్స్ లోకేషన్స్ కోసం కోలీవుడ్ క్రేజీ దర్శకులైన లోకేష్ కనగరాజ్, అట్లీ, నెల్సన్ దిలీప్కుమార్లతో కూడిన కొన్ని ప్రత్యేక సన్నివేశాలను విజయ్ స్వయంగా తెరకెక్కించారని చెప్పారు. అయితే ఎన్నికల తదనంతర పరిణామాల నేపథ్యంలో ఆ సీన్లు సినిమాలో ఉంటాయా లేదా అనేదానిపై తుది నిర్ణయం చిత్రబృందానిదేనని తెలిపారు. కేవీఎన్ ప్రొడక్షన్స్ బ్యానర్పై పూజా హెగ్డే కథానాయికగా నటిస్తున్న ఈ చిత్రం, విజయ్ కెరీర్ లోనే చివరి సినిమా కావడంతో విడుదలకు ముందే అంచనాలు ఆకాశాన్ని తాకుతున్నాయి.
