ఫ్లోరిడాకు చెందిన నాథన్ థామస్ అనే ఒక యువ ఇంజనీరింగ్ ఉపాధ్యాయుడు ప్రపంచంలోనే అతి పిన్న వయస్కుడైన పురుష ప్రొఫెసర్గా సరికొత్త ప్రపంచ రికార్డు సృష్టించారు. గిన్నిస్ వరల్డ్ రికార్డ్స్ (GWR) అధికారిక ప్రకటన ప్రకారం, నాథన్ కేవలం 18 సంవత్సరాల 346 రోజుల వయస్సులోనే మయామి డేడ్ కాలేజీలో ఇంజనీరింగ్ బోధనా పదవిని స్వీకరించి ఈ అరుదైన మైలురాయిని అందుకున్నారు. దీనితో 19 ఏళ్ల వయసులో ప్రొఫెసర్ అయి, గత 306 సంవత్సరాలుగా చెక్కుచెదరకుండా ఉన్న కోలిన్ మెక్లారిన్ రికార్డును నాథన్ బద్దలు కొట్టారు. అంతేకాదు, ప్రపంచంలోనే అతి చిన్న వయసున్న మహిళా ప్రొఫెసర్ ఆలియా సబూర్ (18 సంవత్సరాల 362 రోజులు) రికార్డు కంటే నాథన్ 16 రోజులు చిన్నవాడు కావడం విశేషం.
నాథన్ థామస్ ఆగస్టు 2023లో మయామి డేడ్ కాలేజీలో ‘COP 2270: C for Engineers’ అనే సంక్లిష్టమైన కంప్యూటింగ్, ప్రోగ్రామింగ్ కోర్సును బోధించడం ప్రారంభించారు. తనతో సమాన వయస్సు ఉన్న విద్యార్థులకు క్లాసులు చెప్పడంపై నాథన్ స్పందిస్తూ.. తరగతి గదిలోకి అడుగుపెట్టాక అందరి లక్ష్యం నేర్చుకోవడమేనని, అక్కడ వయస్సు అనేది అస్సలు ముఖ్యం కాదని పేర్కొన్నారు. కష్టమైన విషయాలను కూడా విద్యార్థులకు సులభంగా అర్థమయ్యేలా చెప్పడమే తన బాధ్యతని, ఒక అంశం ఎంత కష్టంగా అనిపించినా, అది ఒక్కసారిగా విద్యార్థికి అర్థమైనప్పుడు వారి ముఖంలో కనిపించే ఆనందమే తనకు సంతృప్తినిస్తుందని గిన్నిస్ ప్రతినిధులతో పంచుకున్నారు.
ఇంజనీర్ల కుటుంబం నుంచి వచ్చిన నాథన్కు చిన్నప్పటి నుంచే గణితంపై మంచి పట్టు ఉండేది. ఆయన కేవలం 10 ఏళ్ల వయసులోనే పాఠశాల విద్యతో పాటు కాలేజీ కోర్సులు చదివే ‘డ్యూయల్-ఎన్రోల్మెంట్’ విధానం ద్వారా మయామి డేడ్ కాలేజీలో చేరారు. ఆ తర్వాత 14 ఏళ్ల వయసులో ఫ్లోరిడా ఇంటర్నేషనల్ యూనివర్సిటీకి మారి, తదుపరి నాలుగేళ్లలోనే ఎలక్ట్రికల్ ఇంజనీరింగ్లో బ్యాచిలర్ మరియు మాస్టర్స్ డిగ్రీలను అత్యుత్తమ ‘ఆనర్స్’తో పూర్తి చేసి ఈ అసాధారణమైన మేధాశక్తిని చాటుకున్నారు.
