అక్కినేని ఇంటి కోడలు, ప్రముఖ నటి శోభితా ధూళిపాళ గతంలో ఓ ఇంటర్వ్యూలో చేసిన రాజకీయ వ్యాఖ్యలకు సంబంధించిన వీడియో ప్రస్తుతం సోషల్ మీడియాలో వైరల్గా మారింది. తనకు వామపక్ష (లెఫ్టిస్ట్) భావజాలం ఉందని, ఏదో ఒక రోజు కమ్యూనిజం తప్పకుండా విజయం సాధిస్తుందని ఆమె అందులో పేర్కొనడం తీవ్ర చర్చకు దారితీసింది. సంపన్నమైన జీవితాన్ని గడుపుతూ, లగ్జరీ లైఫ్ను అనుభవిస్తూ కమ్యూనిస్ట్ సూత్రాల గురించి మాట్లాడటం వైరుధ్యమని నెటిజన్ల నుంచి విమర్శలు వ్యక్తమవుతున్నాయి.
ఈ విమర్శలపై సోషల్ మీడియాలో శోభితకు మద్దతుగా కూడా పలువురు నెటిజన్లు నిలుస్తున్నారు. ప్రజాస్వామ్యంలో ఎవరికైనా తమ సొంత రాజకీయ, సామాజిక అభిప్రాయాలను నిర్భయంగా వెల్లడించే హక్కు ఉందని, ఆమె భావజాలాన్ని వ్యక్తిగత జీవనశైలితో ముడిపెట్టి విమర్శించడం సరికాదని సమర్థిస్తున్నారు.
