లాభాల వాటా పెంపు వెనుక గారడీ!
*సింగరేణి నికర లాభాలు ఘోరంగా పడిపోవడంపై కార్మికుల ఆగ్రహం!!*
* గతేడాదితో పోలిస్తే తగ్గిన లాభాల బోనస్
* ఉత్పత్తి, రవాణాలో స్వల్ప తేడా
* లాభాలు రూ. 6,394 కోట్ల నుండి రూ. 1,754 కోట్లకు పతనం
యాజమాన్య లోపాలు, బకాయిల భారంపై శ్వేతపత్రం విడుదల చేయాలని కార్మిక సంఘాల డిమాండ్!
TODAY 9 WEB DESK
` సింగరేణి సంస్థకు ఈ ఏడాది రూ. 1,754 కోట్ల నికర లాభం వచ్చిందని, అందులో రికార్డు స్థాయిలో 34 శాతం లాభాల వాటాను కార్మికులకు కేటాయిస్తున్నామని ప్రభుత్వం చేస్తున్న ప్రకటనలపై బొగ్గు గని కార్మికులు తీవ్ర అసంతృప్తి వ్యక్తం చేస్తున్నారు. శాతాల పరంగా పెంపుదల అని గొప్పగా ప్రచారం చేసుకుంటున్నప్పటికీ, గతేడాదితో పోలిస్తే తమ చేతికి వచ్చే అసలు నగదు భారీగా తగ్గడంపై కార్మిక లోకం మండిపడుతోంది. వరుసగా మూడేళ్ల పాటు లాభాల వాటా విషయంలో తీవ్ర అన్యాయానికి గురయ్యామని, ఈసారి కూడా శాతాల గారడీతో తమను మభ్యపెట్టే ప్రయత్నం జరుగుతోందని కార్మికులు ఆవేదన వ్యక్తం చేస్తున్నారు.
ఉత్పత్తి స్వల్పంగా తగ్గితే లాభాలు అంతలా ఎలా పడిపోతాయి?
సింగరేణి సంస్థ అధికారిక గణాంకాల ప్రకారం.. గత ఆర్థిక సంవత్సరంలో సంస్థ సాధించిన నికర లాభం ఏకంగా రూ. 6,394 కోట్లు. అప్పట్లో బొగ్గు ఉత్పత్తి 70 మిలియన్ టన్నుల లక్ష్యానికి గాను 68 మిలియన్ టన్నుల ఉత్పత్తి, రవాణా జరిగాయి. అయితే, ప్రస్తుత సంవత్సరంలో బొగ్గు ఉత్పత్తి 58 మిలియన్ టన్నులు, రవాణా 62 మిలియన్ టన్నులుగా నమోదైంది. గత ఏడాదితో పోల్చి చూస్తే ఉత్పత్తి కేవలం 10 మిలియన్ టన్నులు, రవాణా కేవలం 6 మిలియన్ టన్నులు మాత్రమే తగ్గింది. ఉత్పత్తి, రవాణాలో ఇంత స్వల్ప తేడా ఉంటే.. సంస్థ నికర లాభాలు ఏకంగా రూ. 6,394 కోట్ల నుండి రూ. 1,754 కోట్లకు (దాదాపు 4,640 కోట్లు) ఎలా పడిపోతాయని కార్మికులు యాజమాన్యాన్ని నిలదీస్తున్నారు. బొగ్గు బావుల్లో ప్రాణాలను పణంగా పెట్టి అహర్నిశలు శ్రమిస్తున్న తమ కష్టాన్ని యాజమాన్య లోపాలు, ప్రభుత్వ పరిపాలనా వైఫల్యాల వల్ల బూడిదలో పోసిన పన్నీరు చేస్తున్నారని కార్మిక సంఘాలు ఆగ్రహం వ్యక్తం చేస్తున్నాయి.
శ్వేత పత్రం విడుదలకు కార్మికుల డిమాండ్!
ఈ ఏడాది 34 శాతం వాటా ప్రకటించినా నికర లాభాలు దారుణంగా పడిపోవడం వల్ల అర్హులైన ఒక్కో కార్మికుడికి దక్కేది రూ. 1,53,912 మాత్రమే. అదే గత ఏడాది లాభాల వాటా కింద ప్రతి కార్మికుడికి రూ. 1,95,610 లభించింది. అంటే గత ఏడాదితో పోలిస్తే ఈ దసరా పండుగకు ప్రతి కార్మికుడు రూ. 41,698 మేర ప్రత్యక్షంగా నష్టపోతున్నాడు. ఒకవైపు సంస్థను లాభాల బాటలో నడిపించడానికి కార్మికుల ఉత్పాదకత (Output per man-shift) 6.39 టన్నుల నుండి 7.56 టన్నులకు పెరిగినా, తమకు దక్కే ఫలాలు మాత్రం తగ్గిపోవడంపై కార్మికులు ఆందోళన చెందుతున్నారు. సంస్థకు రావాల్సిన వేలాది కోట్ల ప్రభుత్వ బకాయిలను వెంటనే విడుదల చేసి, లాభాల పతనానికి గల అసలు కారణాలపై శ్వేతపత్రం విడుదల చేయాలని, కార్మికులకు పూర్తి స్థాయిలో న్యాయం చేయాలని కార్మిక పక్షాలు డిమాండ్ చేస్తున్నాయి.
అంకెల గారడికి అసలు కారణాలు ఏంటి?!
కేవలం 6 నుండి 10 మిలియన్ టన్నుల ఉత్పత్తి, రవాణా తేడాకే వేల కోట్ల లాభాలు ఆవిరి కావడానికి ప్రధానంగా మూడు కారణాలను అధికారవర్గాలు పేర్కొంటున్నాయి. మొదటిది, విద్యుత్ సంస్థల (TG Genco) నుండి సింగరేణికి రావాల్సిన వేలాది కోట్ల రూపాయల బకాయిలు సకాలంలో వసూలు కాకపోవడం వల్ల సంస్థ అంతర్గత ఆర్థిక భారం పెరిగింది. రెండవది, ఓపెన్ కాస్ట్ గనుల్లో కాంట్రాక్ట్ పనుల నిర్వహణ వ్యయం, యంత్రాల మెయింటెనెన్స్ ఖర్చులు భారీగా పెరగడం లాభాల మార్జిన్‌ను దెబ్బతీసింది. మూడవది, కొత్త బొగ్గు బ్లాకుల విస్తరణలో యాజమాన్య జాప్యం, పరిపాలనాపరమైన లోపాల వల్ల ఉత్పత్తి వ్యయం పెరిగి, అంతిమంగా నికర లాభాలు ఘోరంగా పతనమవడానికి దారితీసింది.
