ప్రధానమంత్రి నరేంద్ర మోదీని రాజకీయంగా తాము ఎంతగా వ్యతిరేకించినప్పటికీ, స్వతంత్ర భారతదేశ అంతర్గత నిర్ణయాలపై విదేశీ వ్యాపారవేత్తలు పెత్తనం చెలాయించడాన్ని ఎట్టిపరిస్థితుల్లోనూ అంగీకరించేది లేదని ఏఐఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ స్పష్టం చేశారు. భారత్‌లో తన శాటిలైట్ ఇంటర్నెట్ సంస్థ ‘స్టార్‌లింక్’ వాణిజ్య సేవల అనుమతుల జాప్యంపై ఎలాన్ మస్క్ తీవ్ర అసంతృప్తి వ్యక్తం చేస్తూ.. రిలయన్స్ అధినేత ముకేశ్ అంబానీని ఉద్దేశించి భారతదేశంలో అసలైన అధికారం ఎవరి చేతుల్లో ఉందంటూ చేసిన వ్యాఖ్యలపై ఒవైసీ తీవ్రస్థాయిలో విరుచుకుపడ్డారు. దేశ ప్రధానిని విమర్శించే ప్రజాస్వామ్య హక్కు ఒక భారతీయ పౌరుడిగా తనకు ఉన్నప్పటికీ, దేశ పాలసీలను, వ్యవస్థలను ఒక విదేశీ కార్పొరేట్ దిగ్గజం శాసించాలని చూడటం ఎంతమాత్రం ఆమోదయోగ్యం కాదని ఆయన తేల్చిచెప్పారు.
ఎల్లప్పుడూ జాతీయవాదం గురించి మాట్లాడే బీజేపీ ప్రభుత్వం.. విదేశీ పారిశ్రామికవేత్తల నుంచి వచ్చే ఒత్తిళ్లను ఎదుర్కోవడంలోనూ అదే స్థాయి దృఢత్వాన్ని ప్రదర్శించాలని ఒవైసీ డిమాండ్ చేశారు. భారత మార్కెట్లో విదేశీ కార్పొరేట్ శక్తుల లాభాల కంటే దేశ పౌరులు, కార్మికుల ప్రయోజనాలకే ప్రభుత్వం అత్యున్నత ప్రాధాన్యత ఇవ్వాలని హితవు పలికారు. రష్యా నుంచి ముడి చమురు కొనుగోళ్ల వ్యవహారంలో అమెరికా ఒత్తిళ్లను ప్రస్తావిస్తూ, విదేశీ ఒత్తిళ్లకు తలొగ్గకుండా భారతదేశం తన సార్వభౌమాధికారం, సొంత ప్రయోజనాలకు అనుగుణంగానే స్వతంత్ర నిర్ణయాలు తీసుకోవాలని ఆయన స్పష్టం చేశారు.
ఇదే అంశంపై కాంగ్రెస్ అగ్రనేత రాహుల్ గాంధీ, అసదుద్దీన్ ఒవైసీ వ్యక్తం చేసిన భిన్న వైఖరులు జాతీయ రాజకీయాల్లో ఆసక్తికర చర్చకు దారితీశాయి. భారతదేశంలో అసలైన పాలకులెవరు అన్న మస్క్ ప్రశ్నను ఆసరాగా చేసుకుని కేంద్రంలోని బీజేపీ సర్కార్ కార్పొరేట్ మిత్రుల ప్రయోజనాల కోసమే పనిచేస్తోందంటూ రాహుల్ గాంధీ విమర్శించగా.. ఒవైసీ మాత్రం అంతర్గత రాజకీయ విభేదాలను పక్కనపెట్టి దేశ సార్వభౌమాధికారం, జాతీయ ప్రయోజనాల పరిరక్షణను ప్రధానంగా తెరపైకి తెచ్చారు. కార్పొరేట్ అనుమతుల్లో పారదర్శకత ఉండాలన్న వాదన ఒకవైపు వినిపిస్తుండగా, దేశ విధానాలపై విదేశీ వ్యాపారుల పెత్తనాన్ని సహించరాదన్న ఒవైసీ వ్యాఖ్యలు ఈ వివాదానికి సరికొత్త రాజకీయ కోణాన్ని తీసుకొచ్చాయి.
