ఫ్రాన్స్ మీదుగా ఇతర దేశాలకు ప్రయాణించే భారతీయులకు ఆ దేశ ప్రభుత్వం అద్భుతమైన శుభవార్త అందించింది. సాధారణ పాస్పోర్ట్ కలిగి ఉండి, ఫ్రాన్స్ విమానాశ్రయాల ద్వారా మూడో దేశానికి వెళ్లే భారతీయ పౌరులకు ఇకపై ‘ఎయిర్పోర్ట్ ట్రాన్సిట్ వీసా’ (Airport Transit Visa) అవసరం లేదని ప్రకటించింది. ఈ కొత్త నిబంధన ఏప్రిల్ 10 నుంచే అమలులోకి వచ్చినట్లు భారత్లోని ఫ్రాన్స్ రాయబార కార్యాలయం అధికారికంగా స్పష్టం చేసింది.
ఈ ఏడాది ఫిబ్రవరిలో ఫ్రాన్స్ అధ్యక్షుడు ఇమ్మాన్యుయేల్ మెక్రాన్ భారత్లో పర్యటించినప్పుడు, భారతీయ ప్రయాణికుల కోసం నిబంధనలు సులభతరం చేస్తామని ఇచ్చిన హామీ మేరకు ఈ నిర్ణయం తీసుకున్నారు. ఏప్రిల్ 9న ఫ్రాన్స్ అధికారిక గెజిట్లో దీనికి సంబంధించిన ఉత్తర్వులను ప్రచురించారు. ఈ మార్పుల వల్ల యూరప్, అమెరికా వంటి దేశాలకు ఫ్రాన్స్ మీదుగా ప్రయాణించే వేలాది మంది భారతీయులకు వీసా కష్టాలు తప్పడమే కాకుండా, ప్రయాణం మరింత సులభతరం కానుంది.
అయితే, ఈ మినహాయింపు పొందే ప్రయాణికులు కొన్ని నిబంధనలను పాటించాల్సి ఉంటుంది. ప్రయాణికులు విమానాశ్రయంలోని అంతర్జాతీయ జోన్ (International Zone) దాటి బయటకు రాకూడదు. కేవలం లేఓవర్ సమయంలో ఎయిర్పోర్ట్ లోపల వేచి ఉండే వారికి మాత్రమే ఈ సౌకర్యం వర్తిస్తుంది. ఇప్పటికే అధికారిక ఫ్రాన్స్-వీసాస్ (France-Visas) ప్లాట్ఫామ్లో ఈ సమాచారాన్ని అప్డేట్ చేసినట్లు అధికారులు వెల్లడించారు.
