పశ్చిమాసియాలో యుద్ధాన్ని ముగించడానికి మరియు చమురు రవాణాకు కీలకమైన హర్మూజ్ జలసంధిని తెరవడానికి ఇరాన్ అమెరికా ముందు మూడు ప్రధాన షరతులను ఉంచింది. తమ ఓడరేవులపై విధించిన దిగ్బంధనాన్ని ఎత్తివేయాలని, పశ్చిమాసియాలో యుద్ధాన్ని ముగించాలని ఇరాన్ కోరింది. అలాగే, అత్యంత కీలకమైన తమ అణు కార్యక్రమంపై చర్చలను మాత్రం దౌత్య ప్రక్రియలో తదుపరి దశలో జరపాలని ఈ ప్రతిపాదనల్లో స్పష్టం చేసింది.
ఇరాన్ చేసిన ఈ ప్రతిపాదనలపై అమెరికా అధ్యక్షుడు డొనాల్డ్ ట్రంప్ తీవ్ర అసంతృప్తి వ్యక్తం చేసినట్లు తెలుస్తోంది. ఇరాన్ అణు కార్యక్రమంపై చర్చలను వాయిదా వేసేలా ఈ షరతులు ఉండటమే ట్రంప్ అసహనానికి ప్రధాన కారణంగా అమెరికా అధికారులు భావిస్తున్నారు. ఇరాన్ వద్ద అణ్వాయుధాలు ఉండకూడదన్నది ట్రంప్ ప్రధాన లక్ష్యం కావడంతో, అణు కార్యక్రమాన్ని మినహాయించి చేసుకునే ఏ ఒప్పందానికి అమెరికా అంగీకరించబోదని విదేశాంగ కార్యదర్శి మార్కో రూబియో సైతం స్పష్టం చేశారు.
ఇరాన్ తాజా ప్రతిపాదనలపై వైట్హౌస్ నుంచి ఇప్పటివరకు ఎలాంటి అధికారిక స్పందన రాలేదు. అయితే, తమ పరిమితుల పట్ల స్పష్టతతో ఉన్నామని, అమెరికా ప్రజలతో పాటు ప్రపంచానికి మేలు చేకూర్చే ఒప్పందానికి మాత్రమే అధ్యక్షుడు ట్రంప్ అంగీకరిస్తారని వైట్ హౌస్ ప్రతినిధి ఒక ప్రకటనలో తెలిపారు. అణు ఒప్పందంపై ఇరాన్ నాయకత్వం వెనక్కి తగ్గకపోవడంతో ఇరు దేశాల మధ్య శాంతి చర్చల్లో ప్రతిష్టంభన కొనసాగుతోంది.
