పశ్చిమ బెంగాల్ అసెంబ్లీ ఎన్నికల్లో ఓటమి తర్వాత అధికార తృణమూల్ కాంగ్రెస్ (టీఎంసీ) పార్టీలో అంతర్గత విభేదాలు ఒక్కసారిగా భగ్గుమన్నాయి. పార్టీ ఆవిర్భావం తర్వాత ఎన్నడూ లేనంత తీవ్రమైన రాజకీయ సంక్షోభాన్ని మరియు తిరుగుబాటును టీఎంసీ ప్రస్తుతం ఎదుర్కొంటోంది. ఈ నేపథ్యంలో అధినేత్రి మమతా బెనర్జీ బుధవారం ఒక సంచలన నిర్ణయం తీసుకున్నారు. పార్టీ మరింత చీలిపోకుండా అప్రమత్తమైన ఆమె.. టీఎంసీ రాష్ట్ర కమిటీతో పాటు దానికి అనుబంధంగా ఉన్న అన్ని రకాల సంఘాలు, కమిటీలను తక్షణమే రద్దు చేస్తున్నట్లు అధికారికంగా ప్రకటించారు.
పార్టీ నుంచి బహిష్కరణకు గురైన ఎమ్మెల్యే రీతబ్రత బెనర్జీ నేతృత్వంలో కనీసం 58 మంది తిరుగుబాటు ఎమ్మెల్యేలు ఆయనను తమ ప్రతిపక్ష నేతగా ఎన్నుకున్న గంట వ్యవధిలోనే మమతా బెనర్జీ ఈ కఠిన నిర్ణయం తీసుకోవడం గమనార్హం. కాగా, పార్టీ వ్యతిరేక చర్యలకు పాల్పడ్డారనే ఆరోపణలపై ఎమ్మెల్యేలు రీతబ్రత బెనర్జీ, సాందీపన్ సాహాలను సోమవారమే మమత పార్టీ నుంచి బహిష్కరించారు. గత పదిహేనేళ్లుగా బెంగాల్ను ఏకఛత్రాధిపత్యంగా పాలించిన టీఎంసీ.. ఈ ఎన్నికల ఓటమి తర్వాత శరవేగంగా కుప్పకూలుతోందని, ప్రజాప్రతినిధులు సామూహికంగా రాజీనామాలు చేస్తున్నారని రాజకీయ వర్గాలు పేర్కొంటున్నాయి.
ఈ సంక్షోభంపై తృణమూల్ కాంగ్రెస్ స్పందిస్తూ.. ప్రతి స్థాయిలోనూ సమగ్రమైన ఆత్మపరిశీలన, పనితీరు సమీక్ష మరియు సంస్థాగత మదింపు ప్రక్రియను చేపడతామని వెల్లడించింది. ఈ సమీక్షల అనంతరం వచ్చిన ఫలితాల ఆధారంగా సంస్థాగతంగా అన్ని విభాగాలను పూర్తిగా ప్రక్షాళన చేసి, నూతన కమిటీలను త్వరలోనే ప్రకటిస్తామని తెలిపింది. భవిష్యత్ సవాళ్లను సరికొత్త ఉత్సాహంతో ఎదుర్కొనేందుకు, పార్టీని క్షేత్రస్థాయి నుంచి మరింత బలోపేతం చేసేందుకు తాము కట్టుబడి ఉన్నామని మమతా బెనర్జీ తన అధికారిక ‘ఎక్స్’ (ట్విట్టర్) ఖాతా ద్వారా స్పష్టం చేశారు.
