ప్రముఖ ఇన్స్టంట్ మెసేజింగ్ ప్లాట్ఫామ్ టెలిగ్రామ్ (Telegram) ప్రస్తుతం ఒక ‘కొత్త డార్క్ వెబ్’గా మారిపోయిందని, సైబర్ నేరగాళ్లకు, ఉగ్రవాదులకు, పరీక్షల లీకేజీ ముఠాలకు ఇది ప్రధాన అడ్డాగా రూపాంతరం చెందిందని కేంద్ర ప్రభుత్వం ఢిల్లీ హైకోర్టుకు సంచలన నివేదిక సమర్పించింది. దేశవ్యాప్తంగా తీవ్ర సంచలనం సృష్టించిన నీట్ (NEET UG 2026) పరీక్షల అక్రమాల నేపథ్యంలో టెలిగ్రామ్పై విధించిన తాత్కాలిక నిషేధాన్ని గట్టిగా సమర్థిస్తూ కేంద్రం కోర్టులో అఫిడవిట్ దాఖలు చేసింది.
రాబోయే జూన్ 21న జరగనున్న నీట్ రీ-టెస్ట్ను అత్యంత పకడ్బందీగా నిర్వహించేందుకు ప్రభుత్వం ఈ కఠిన చర్యలు చేపట్టింది. గత మే 3న జరిగిన నీట్ పరీక్ష పేపర్ లీక్ కావడం దేశవ్యాప్తంగా తీవ్ర దుమారం రేపిన సంగతి తెలిసిందే. ఈ ఘటనపై సీబీఐ విచారణ జరుగుతుండటంతో పాటు పాత పరీక్షను రద్దు చేసి పునర్నిర్వహిస్తున్నారు. ఈ క్రమంలో, ‘నీట్ మాఫియా’ వంటి రహస్య టెలిగ్రామ్ ఛానెళ్ల ద్వారా మళ్లీ ఎలాంటి అక్రమాలు జరగకుండా నిరోధించేందుకే జూన్ 22 వరకు ఈ తాత్కాలిక నిషేధం విధించినట్లు కేంద్రం కోర్టుకు స్పష్టం చేసింది. టెలిగ్రామ్లోని ఎండ్-టు-ఎండ్ ప్రైవసీ ఫీచర్లను ఆసరాగా చేసుకుని నేరగాళ్లు తమ ఫోన్ నంబర్లు, ఐడీలను గోప్యంగా ఉంచుతూ చైల్డ్ పోర్నోగ్రఫీ, మాదకద్రవ్యాల సరఫరా, ఉగ్రవాద ప్రచారం, ఆర్థిక మోసాలు వంటి చట్టవ్యతిరేక కార్యకలాపాలకు విచ్చలవిడిగా పాల్పడుతున్నారని అఫిడవిట్లో ఆరోపించింది.
మరోవైపు, కేంద్ర ప్రభుత్వ నిర్ణయం భారతదేశంలోని సుమారు 150 మిలియన్ల టెలిగ్రామ్ వినియోగదారుల భావప్రకటనా స్వేచ్ఛను హరిస్తోందని ఆరోపిస్తూ టెలిగ్రామ్ సంస్థ ఢిల్లీ హైకోర్టును ఆశ్రయించింది. కొందరు నేరగాళ్ల చర్యల వల్ల కోట్లాది మంది సామాన్య వినియోగదారులను శిక్షించడం ఎంతవరకు సమంజసమని వాదించింది. అయితే, ఈ పిటిషన్పై విచారణ చేపట్టిన ఢిల్లీ న్యాయస్థానం, టెలిగ్రామ్ సంస్థకు ఎలాంటి తక్షణ ఊరట కల్పించలేదు. దేశంలో అత్యంత ప్రతిష్టాత్మకమైన నీట్ పరీక్ష పవిత్రతను, దేశ భద్రతను కాపాడేందుకే ఈ తాత్కాలిక చర్యలు తీసుకున్నట్లు కేంద్ర ప్రభుత్వం కోర్టు ముందు పునరుద్ఘాటించింది.
