మెగా పవర్ స్టార్ రామ్ చరణ్ తన కెరీర్లోనే మైల్స్టోన్ హిట్గా నిలిచిన ‘పెద్ది’ చిత్రం సాధించిన భారీ విజయంతో ఫుల్ జోష్లో ఉన్నారు. ఈ సినిమా ప్రపంచవ్యాప్తంగా రూ. 400 కోట్లకు పైగా వసూళ్లు రాబట్టి సంచలనం సృష్టిస్తున్న నేపథ్యంలో, ఆయన ప్రముఖ జాతీయ మీడియా ఛానల్ ‘రిపబ్లిక్ టీవీ’ ప్రత్యేక చర్చా కార్యక్రమంలో పాల్గొన్నారు. ఈ సందర్భంగా యాంకర్ అడిగిన ఒక ఆసక్తికరమైన ప్రశ్నకు చరణ్ స్పందిస్తూ.. ఏపీ మంత్రి నారా లోకేశ్తో తన ప్రస్థానాన్ని పోల్చడాన్ని మనస్ఫూర్తిగా అంగీకరిస్తున్నట్లు తెలిపి అందరినీ ఆశ్చర్యపరిచారు.
ఇంటర్వ్యూలో యాంకర్ మాట్లాడుతూ.. నాలుగుసార్లు సీఎంగా చేసిన చంద్రబాబు నాయుడు గారి అండ ఉన్నా, నారా లోకేశ్ ఎప్పుడూ ఆ పవర్ను ఈజీగా తీసుకోలేదని, గ్రౌండ్ లెవెల్ నుంచి కష్టపడి ‘సెల్ఫ్ మేడ్ లీడర్’గా ఎదిగారని గుర్తు చేశారు. చిరంజీవి గారి వారసుడిగా ఎంట్రీ ఇచ్చి, స్వయంకృషితో గ్లోబల్ స్టార్గా ఎదిగిన మీ ఇద్దరి ప్రస్థానంలో చాలా పోలికలు ఉన్నాయి కదా అని అడగ్గా, చరణ్ ‘కచ్చితంగా’ అని సమాధానమిచ్చారు. లోకేశ్ కింది స్థాయి నుంచి కష్టపడి ప్రజా నాయకుడిగా మారారనే విషయంతో తాను పూర్తిగా ఏకీభవిస్తున్నట్లు స్పష్టం చేశారు.
ప్రారంభంలో ఇద్దరిపైనా భారీ అంచనాలు, విమర్శలు ఉన్నప్పటికీ, వాటన్నింటినీ పట్టుదలతో అధిగమించారని చరణ్ పేర్కొన్నారు. వారసత్వం అనేది కేవలం ఎంట్రీ కార్డ్ మాత్రమేనని, టాలెంట్, కష్టపడే తత్వం ఉంటేనే ఏ రంగంలోనైనా నిలదొక్కుకోగలమని నిరూపించామన్నారు. చరణ్ తన నటనతో ‘మగధీర’, ‘రంగస్థలం’, ‘ఆర్ఆర్ఆర్’ వంటి చిత్రాలతో విశ్వవ్యాప్త గుర్తింపు తెచ్చుకుంటే.. లోకేశ్ ‘యువగళం’ పాదయాత్ర ద్వారా ప్రజల్లోకి వెళ్లి లీడర్గా నిరూపించుకున్నారని, ఈ విధంగా ఇద్దరూ తండ్రులకు తగ్గ తనయులుగా ఎదగడం విశేషమని నెటిజన్లు ప్రశంసిస్తున్నారు.
