ఎలాంటి ప్రయాణ పత్రాలు లేకుండా భారతదేశంలోకి విదేశీ మాజీ సైనికులు అక్రమంగా చొరబడుతుండటం దేశీయ జాతీయ భద్రతా సంస్థలను తీవ్ర ఆందోళనకు గురిచేస్తోంది. తాజాగా, ఇండియా నుండి నేపాల్లోకి అక్రమంగా ప్రవేశించేందుకు ప్రయత్నించిన అమెరికా మాజీ నేవీ అధికారి జోర్డాన్ బ్రౌన్ను ఉత్తరప్రదేశ్ సరిహద్దుల్లో ‘సహస్త్ర సీమా బల్’ (SSB) బలగాలు అదుపులోకి తీసుకున్నాయి. ఈ అరెస్ట్ వ్యవహారం ఈశాన్య భారతదేశం కేంద్రంగా సాగుతున్న అంతర్జాతీయ ఆయుధాల అక్రమ రవాణా నెట్వర్క్ను మరియు వివిధ అంతర్జాతీయ కుట్ర కోణాలను మరోసారి వెలుగులోకి తెచ్చింది.
కాలిఫోర్నియా ప్రాంతానికి చెందిన జోర్డాన్ బ్రౌన్ గతంలో అమెరికా సైన్యంలో ఆరేళ్లపాటు సేవలు అందించినట్లు విచారణలో తేలింది. సముద్ర మార్గం ద్వారా భారత్లోకి అడుగుపెట్టిన ఇతడు.. గోవా, బెంగళూరు, లఖ్నవూ వంటి నగరాల్లో సంచరించినట్లు భద్రతా అధికారులు గుర్తించారు. తన పాస్పోర్టు పోయిందని, ఒక నేపాల్ వ్యక్తిని కలవడానికే సరిహద్దు దాటుతున్నానని బ్రౌన్ పొంతనలేని సమాధానాలు చెబుతుండటంతో నిఘా వర్గాలు లోతుగా దర్యాప్తు చేస్తున్నాయి. ఈ క్రమంలోనే ఇటీవల కోల్కతాలో అరెస్టయిన అమెరికా మాజీ సైనికుడు మాథ్యూ వాన్డైక్, అలాగే ఐదుగురు ఉక్రేనియన్ల ఉదంతం దేశంలో పెద్ద కలకలం రేపింది. ఐరోపా నుండి తీసుకువచ్చిన అత్యాధునిక డ్రోన్లను ఈ విదేశీ కిరాయి సైనికుల ముఠా మిజోరాం మీదుగా మయన్మార్లోని సైనిక తిరుగుబాటుదారులకు దొంగతనంగా రవాణా చేస్తోందని జాతీయ దర్యాప్తు సంస్థ (NIA) కనిపెట్టింది.
ఈ విదేశీ మాజీ సైనికులు సాధారణ టూరిస్ట్ వీసాలపై భారత్లోకి ప్రవేశించి, చట్టవిరుద్ధంగా మయన్మార్ సరిహద్దు రక్షిత ప్రాంత పర్మిట్ (PAP) లేకుండానే సరిహద్దులు దాటుతున్నట్లు సమాచారం. అక్కడ మయన్మార్ మిలిటెంట్లకు అత్యాధునిక డ్రోన్ల కూర్పు, మరమ్మతులు మరియు ఎలక్ట్రానిక్ యుద్ధరీతులలో వీరు ప్రత్యేక శిక్షణ ఇస్తున్నట్లు రష్యా కూడా గతంలో ఆరోపించింది. ఈ వివాదంలో ప్రధాన సూత్రధారి అయిన వాన్డైక్ ‘సన్స్ ఆఫ్ లిబర్టీ ఇంటర్నేషనల్’ అనే వివాదాస్పద స్వచ్ఛంద సంస్థ వ్యవస్థాపకుడు కాగా, ఇతనికి గతంలో లిబియా అంతర్యుద్ధంలో గడాఫీకి వ్యతిరేకంగా, అలాగే సిరియా అంతర్యుద్ధంలో పాల్గొన్న చరిత్ర ఉంది. 2022 మార్చి నుండి ఇతని సంస్థ ఉక్రెయిన్లో రష్యాకు వ్యతిరేకంగా కూడా పనిచేస్తోందని, వీరు భారత్ను కేవలం ఒక ఆయుధ దొంగ రవాణా మార్గంగా వాడుకుంటున్నారని అధికారులు నిర్ధారించారు.
